ՀՀԿ-ԲՀԿ հակասություններից տպավորություն է ստեղծվում, որ իշխանությունները միտումնավոր են նման քայլերի գնում՝ հասարակության ուշադրությունը կարևոր խնդիրներից շեղելու և նման ինտրիգների վրա բևեռելու համար: Առավել ևս, որ արդեն մի քանի օր է՝ Գյումրիում, Վանաձորում, Նոյեմբերյանում պարբերաբար բողոքի ակցիա են անցկացնում վրացական պետհամարանիշեր ունեցող մեքենաների վարորդները՝ բողոքելով մաքսազերծման նոր կարգի դեմ: Մյուս կողմից` անակնկալ կերպով թանկացել է ալյուրի գինը, իսկ դրա հետևանքով՝ նաև հացը: Դեռևս շարունակում է չլուծված մնալ տոնավաճառներից վտարված առևտրականների հարցը: Ու ահա այս ամենի ֆոնին հանկարծ սկսել են խնդիրներ ի հայտ գալ իշխող կոալիցիայում:
ՍԴՀԿ վարչության անդամ Գուրգեն Եղիազարյանը կարծում է, որ իշխանությունները հիմա պարզապես խուճապի մեջ են ընկել: Իսկ ՀԼԿ նախագահ Հովհաննես Հովհաննիսյանի հավաստմամբ, ժողովրդի ուշադրությունը շեղելն անհնար է: «Իշխանությունը, իհարկե, փորձում է ֆոն ստեղծել, հասարակության ուշադրությունը շեղել առկա սոցիալական խնդիրներից, բայց դրա համար կա Հայ ազգային կոնգրեսը: Նման ինտրիգներով սոված ժողովրդի ուշադրությունը չես կարող շեղել, կիսասոված ժողովուրդը գուցե խաբվի, բայց սոված ժողովրդի դեպքում դա գրեթե անհնար է, իսկ սովածությունը ներքին շերտից բարձրանում է վերև, և միջին խավն էլ է արդեն սոված»,- տեսակետ հայտնեց Հովհաննես Հովհաննիսյանը:
