Բրիտանացի երգիչ Էդ Շիրանը հայտարարել է, որ Pink Floyd խմբի հետ ելույթ կունենա Օլիմպիական խաղերի փակման արարողության ժամանակ, որը տեղի կունենա օգոստոսի 12-ին: Gigwise-ի հաղորդմամբ` այս ամասին երգիչը պատմել է ավստրալական ռադիոյին տված հարցազրույցի ժամանակ:
Ավելի վաղ Շիրանն ակնարկել էր, որ Օլիմպիադայի փակման արարողության ժամանակ երգելու է մի հայտնի խմբի հետ, բայց չէր ճշգրտել` ում հետ: Դրանից ելնելով` մամուլում ենթադրություն էր հայտնվել, որ նա երգելու է The Who-ի հետ: Սակայն այժմ նա պարզաբանել է, որ երգելու է հենց Pink Floyd-ի հետ: Լեգենդար գործընկերների հետ Շիրանը կկատարի Wish You Were Here ստեղծագործությունը` Pink Floyd-ի` 1975-ին լույս տեսած համանուն ալբոմից:
Սպասվում է, որ Շիրանից բացի Օլիմպիադայի փակման արարողության ժամանակ ելույթ կունենան Muse-ը, Take That-ը, The Who-ն և այլ կատարողներ:
