Թուրքական Aydınlık թերթի փոխանցմամբ՝ ընդդիմադիր «Աշխատավորական» կուսակցությունը պահանջել է «անցանկալի անձ» ճանաչել և երկրից վտարել Ադանա քաղաքում ԱՄՆ գլխավոր հյուպատոս Դարիա Դարնելին:
Կուսակցության փոխնախագահ Հասան Բասրի Օզբեյը դա պատճառաբանում է նրանով, որ ամերիկացի հյուպատոսն Ադանայից ուղղորդում և ղեկավարում է Սիրիայի նախագահ Բաշար Ասադի ռեժիմի դեմ գործող սիրիացի ահաբեկիչների գործունեությունը:
Օզբեյը կոչ է արել փակել նաև Ինջիրլիքում գտնվող ամերիկյան ավիաբազան և Հաթայ ու Քիլիս նահանգներում գտնվող սիրիացի փախստականների ճամբարները, որոնցում էլ պատրաստում են այդ ահաբեկիչներին՝ ապակայունացնելու համար Սիրիայի ներքին իրավիճակը: Օզբեյի տվյալներով՝ ցայժմ այդ ճամբարներում ամերիկացիները պատրաստել և Սիրիա են գործուղել մոտ 5000 ահաբեկիչների:
