Tetra Pak կայսրության ժառանգ Հանս Քրիսթիան Ռաուսինգին չորեքշաբթի` օգոստոսի 1-ին, դատապարտել են տասը ամսվա ազատազրկման` իր կնոջ մարմինը հողին ժամանակին հանձնելու արարողությանը խոչընդոտելու համար: Այս մասին հաղորդել է Agence France-Presse-ը:
Դատավճիռը կիրականացվի միայն երկու տարուց, այն բանից հետո, երբ Ռաուսինգը բուժվի թմրանյութի կախվածությունից:
Օգոստոսի 1-ին Ռաուսինգին մեղավոր են ճանաչել նաև թմրանյութի ազդեցության տակ ավտոմեքենա վարելու մեջ:
49-ամյա միլիարդատեր Ռաուսինգը ձերբակալվել էր 2012թ-ի հուլիսին ավտոմեքենան անզգույշ վարելու համար: Նրա մոտ այդ ժամանակ թմրանյութեր են հայտնաբերել, որից հետո ոստիկանությունը սկսել է փնտրել նրա կնոջը` 48-ամյա Եվա Ռաուսինգին: Նրան մահացած են գտել լոնդոնյան բնակարանում: Ավելի ուշ պարզ է դարձել, որ նրա մարմինը աղբի համար նախատեսված տոպրակների մեջ փաթաթված է մնացել երկու ամիս:
Միլիարդատիրոջը կասկածել են կնոջ սպանության մեջ: Սակայն դիահերձման ժամանակ պարզ է դարձել, որ նա մահացել է թմրադեղի ազդեցության պատճառով: Նրա օրգանիզմում մեծ քանակությամբ կոկային է հայտնաբերվել:
Ռաուսինգը հայտնել է դատարանին, թե չի հիշում ինչպես է կինը մահացել, այդ պատճառով էլ շարունակել է իրեն այնպես պահել, ասես ոչինչ չի եղել: