Սյունիքի մարզում ուրանի հանքավայրի երկրաբանահետախուզական աշխատանքների իրականացումը կստիպի բնակիչներին հեռանալ իրենց տներից: Ինչպես գիտենք, «Հայ-ռուսական լեռնահանքային կազմակերպություն» փակ բաժնետիրական ընկերությանն արդեն շահագործման արտոնագիր է տրված, և այժմ աշխատանքներն իրականացվում են Փխրուտի հանքավայրի տարածքում: Տեղի բնակիչների խոսքով` ուրանի հանքավայրն ընդգրկում է Կապանից Քաջարան ավտոճանապարհի՝ Ողջի գետի աջափնյա և ձախափնյա տարածքները՝ ձգվելով դեպի գետի ակունքը՝ մինչև Դավաչի տեղամասը, Քաջարան քաղաքից 6 կմ դեպի հյուսիս-արևմուտք:
Ուրանի հանքավայրի տարածքում գտնվող բնակավայրերն են Քաջարան քաղաքը, Լեռնաձոր, Ձագեձոր, Կաթնառատ, Փխրուտ գյուղերը, ևս չորս համայնքներ: Հանքավայրի ապագա շահագործողներն առաջարկում են շահագործումից մոտ տասը տարի հետո միայն վճռել բնակչությանը տեղահանելու կամ տեղում թողնելու խնդիրը: Սակայն լեռնաձորցիները, ինչպես և մարզի բնակչությունը, կտրականապես դեմ է այդ հանքավայրի շահագործմանը: Անորոշությունը, դժգոհությունը և ուրանի նկատմամբ սարսափն այն աստիճանի է, որ մարդիկ նույնիսկ որոշել են թողնել տները և հեռանալ տարածքից:
Լեռնաձոր գյուղի ավագանու անդամներն արդեն դիմել են ՀՀ նախագահին, Ազգային ժողով, կառավարությանը և խնդրել հաշվի առնելով համայնքի բնակչության դժգոհությունն ու մերժողական վերաբերմունքի արժանացած հարցի արդիականությունն ու մտահոգվել այն հետևանքներով, որ կարող են առաջանալ ինչպես հետազոտման, այնպես էլ հետագա շահագործման արդյունքում, սակայն առայժմ՝ ոչ մի արդյունք:
Իսկ բնակիչները համոզված են, որ առջևում իրենց առջև ծառանալու են բազմաթիվ էկոլոգիական անկանխատեսելի հետևանքներ, ռադիոակտիվ ճառագայթման անխուսափելիություն, Ողջի գետի ավազանի աղտոտումը ռադիոակտիվ նյութերով:
Նշենք, որ Կապանում դեռ 2010 թվականի նոյեմբերի վերջի տվյալներով, մոտ 14 հազար մարդ է ստորագրել ուրանի հանքավայրի շահագործման դեմ, և ստորագրահավաքը շարունակվում է:
