Հուլիսի 31-ին տեղի է ունեցել «Քաղաքը մերն է» քաղաքացիական նախաձեռնության 12-րդ ժողովը, որի ժամանակ քննարկվել են Գյումրու ՏԻՄ ընտրությունների հետ կապված զարգացումները, հանրային արձագանքները, հանրային քարոզչության պլանը, նախաձեռնության կողմից Գյումրու ավագանու անդամության թեկնածուների վարքականոնի նախագիծը, հնարավոր թեկնածուների ցանկը, առաջադրումների և թղթատարության օրենքով սահմանված կարգը, Գյումրիում նախաձեռնության գրասենյակ վարձակալելու անհրաժեշտությունը և այլն:
Ժողովի ժամանակ ներկայացվել է «Քաղաքը մերն է» քաղաքացիական նախաձեռնության նույնանուն պարբերականի առաջին թողարկումը` 2 մամուլ ծավալով և 8.000 տպաքանակով թերթը` նախաձեռնության անդամների հետ հարցազրույցներով, գործող ավագանու (Գյումրի, 5-րդ գումարում` 2008-2012թթ.) նիստերի մասնակցության աղյուսակներով: Տեղեկացվեց, որ պաշտոնաթերթը Գյումրիում տարածվում է անվճար` հանրության տեղեկացնելու նախաձեռնության գաղափարները, և, որ մինչև ընտրությունները լույս է տեսնելու պաշտոնաթերթի ևս 3 թողարկում:
Ժողովի ընթացքում ներկայացվեցին Գյումրիում հուլիսի 23-30-ը անցկացված հանրային կարծիքի հարցման արդյունքները ավագանու անդամության հնարավոր թեկնածուների մասին: Բացատրվել է, որ Գյումրիում, իրենց բնակարաններում պատահական և որոշակի ընտրանքով, անստորագիր հարցվել է 1008 հոգի, պարզվել են ավագանու անդամության հնարավոր 40 թեկնածուների վարկանիշերը, ներառյալ գործող ավագանու անդամներինը: Ներկաները, կատարված վարկանշային հարցումների, անցած տարիներին և վերջին ամիսներին նախաձեռնության մասնակիցների գործունեության, իրենց հետաքրքրությունների և նախաձեռնության Հռչակագրի սկզբունքների հիման վրա, կազմել են Գյումրու ավագանու կայանալիք ընտրություններում նախաձեռնության կողմից առաջադրվող հնարավոր թեկնածուների ցանկը, որում ներառնվել են 11 հոգի, որոնցից 3-ը կանայք են: Նրանց ցանկը` կենսագրականներով և լուսանկարներով հրապարակվելու է օգոստոսի 1-ին, հանրային արձագանքների, առաջարկությունների և հնարավոր քննադատության ակնկալիքով:
Որոշվել է, որ նախաձեռնության կողմից թեկնածուների վերջնական ցանկը կհաստատվի հանրային արձագանքներն ստանալուց հետո` օգոստոսի 5-ին, առաջադրումներն արվելու են մինչև օգոստոսի 10-ը ներառյալ:
«Քաղաքը մերն է» քաղաքացիական նախաձեռնության 13-րդ ժողովը տեղի կունենա օգոստոսի 4-ին ժամը 15-ին «Շիրակ կենտրոնի» գրասենյակում: