ԱԺ առողջապահության, մայրության և մանկության հարցերով հանձնաժողովի լսումներին մասնակցում էր նաև ՄԱԿ-ի մանկական հիմնադրամի հայաստանյան գրասենյակի ղեկավար Լեյլի Մոշիրին, ով հայտարարեց, թե կրծքով սնուցման վերաբերյալ օրենսդրական դաշտ ստեղծելու առումով Հայաստանի կառավարությունը թերանում է, և մինչ այժմ որոշակի փոփոխություններ են կատարվել միայն գովազդի մասին օրենքում:
Մոշիրին տեղեկացրեց, որ Եվրոպայի 45 երկրներից 25-ը իրենց ազգային օրենսգրքերի մեջ ներառել են «Կրծքի կաթի փոխարինիչների վաճառահանման մասին» միջազգային կոնվենցիայի դրույթները, և ակնկալվում է, որ Հայաստանը ևս կմիանա այդ երկրների թվին:
Մոշիրին հիշեցրեց, որ դեռևս 2005թ. իրենք ՀՀ առողջապահության նախարարության հետ համատեղ մշակել էին օրենքի նախագիծ, որը, սակայն, ԱԺ չմտավ:
«Եթե դուք մտածում եք Ձեր երեխաների առողջ ապագայի մասին, ապա պետք է հստակեցնեք օրենսդրական դաշտը, քանզի ՄԱԿ-ի մանկական հիմնադրամի հետազոտությունները ցույց են տվել, որ մինչև 6 ամսական տարիքը միայն կրծքով սնուցում իրականացնելու դեպքում տարեկան կարելի է փրկել 1,3 մլն երեխայի կյանք»,- արձանագրեց Լ. Մոշիրին:
Նա նշեց, որ շշով սնվող երեխաները ավելի հաճախ են ծանր ինֆենկցիաներով վարակվում: Կրծքով սնվող երեխաները 25 անգամ ավելի փոքր հավանականություն ունեն կյանքի առաջին երկու ամիսների ընթացքում փորլուծությունից մահանալու:
Մոշիրին շեշտեց, որ մանկական փոշի կերերը անգամ փակ վիճակում կարող են ստերիլ չլինել և մի շարք քիմիական տարրեր պարունակել, որոնք վնասակար են երեխայի առողջության համար:
