Իրանական Mehr News լրատվական գործակալության փոխանցմամբ՝ ներկայումս Իրանը ծնելիության մակարդակով տարածաշրջանի 26 երկրներում զբաղեցնում է 25-րդ տեղը: Այս մասին հայտարարել է Իրանի քաղաքացիական կացության գրանցման ակտերի բյուրոյի ղեկավար Ալի Աքբար Մահզունը:
Վերջինիս խոսքերով՝ ծնելիության մակարդակի անկումը կապված է ամուսնական տարիքի բարձրացման, առաջին երեխայի ուշ ծնվելու, ֆինանսական խնդիրների հետ. «1947 թվականին Իրանում աղջիկների համար ամուսնական տարիքը 15 տարեկանից բարձրացվեց 18-ի, իսկ տղաների համար՝ 18-ից 20-ի:
Իրանում Իսլամական հեղափոխության հաղթանակից հետո աղջիկների համար ամուսնական տարիքը դարձյալ նվազեցվեց 15-ի, իսկ տղաների համար՝ 18-ի: Դա հանգեցրեց ծնելիության մակարդակի բարձրացմանը:
Սակայն այն բանից հետո, ինչ 1988 թվականին վերացվեցին բազմազավակ ընտանիքների արտոնությունները և սոցիալական պաշտպանությունը (ապահովագրություն, նպաստներ և այլն), Իրանում ծնելիության մակարդակը վերստին սկսեց անկում ապրել»:
Հիշեցնենք, որ 2011 թվականի վերջին Իրանում անցկացված մարդահամարի տվյալները ցույց են տվել, որ Իրանի բնակչության թվաքանակը հասել է 75,149,669 մարդու: Իրանի բնակչության 50.4 տոկոսը կազմում են տղամարդիկ, իսկ 49.6 տոկոսը՝ կանայք: Բնակչության 28.5 տոկոսը բնակվում է գյուղերում, իսկ 71.5 տոկոսը՝ քաղաքներում:
