Բեթմենի դիմակով երեք զինված անձինք հարձակում են գործել մեքսիկական երկու կինոթատրոնների վրա «Մութ ասպետ.Լեգենդի վերածնունդ» ֆիլմի ցուցադրության ժամանակ: Այս մասին հաղորդում է Agence France-Presse-ը: Կողոպուտի դեպքերը գրանցվել են անցած գիշեր՝ երկրի հյուսիսային Չիուաուա նահանգում, որը սահմանակից է ԱՄՆ-ին:
Առաջին հարձակումը տեղի է ունեցել նահանգի համանուն շրջկենտրոնում՝ Չիուաուա քաղաքում: Սևազգեստ զինված անձինք թալանել են Cinepolis ցանցի կինոթատրոնի դրամարկղը: Երկրորդ անգամ նրանք ներխուժել են նույն քաղաքի Cinemax կինոթատրոն:Այնտեղ նրանք ծանր վիրավորել են մենեջերին: Նահանգի իշխանությունների փոխանցմամբ՝ հանցագործները գիշերային «ռեյդի» արդյունքում 18 հազար դոլար են հափշտակել:
«Մութ ասպետ.Լեգենդի վերածնունդ» ֆիլմի ցուցադրություններն աշխարհում անցկացվում են անվտանգության խստագույն միջոցառումների ուղեկցությամբ: Պատճառը հուլիսի 20-ին Կոլորադոյի Ավրորա քաղաքի կինոթատրոնում տեղի ունեցած հրաձգությունն էր, ինչի հետևանքով 12 մարդ սպանվեց:
