Ռուսական Regnum լրատվական գործակալության փոխանցմամբ՝ ադրբեջանցի քաղաքագետ Զարդուշտ Ալիզադեն մեկնաբանել է ամերիկացի կոնգրեսական Դեյն Ռոռաբահերի այն հայտարարությունը, թե Վաշինգտոնը պետք է աջակցի «երկու Ադրբեջանների միավորմանը».
«Ես շնորհավորում եմ ամերիկացի կոնգրեսական Դեյն Ռոռաբահերին, ով դարձավ Ադրբեջանի նախկին նախագահ Աբուլֆազ Էլչիբեյի գաղափարախոսության հետևորդը: Սակայն ես ցանկանում եմ կոնգրեսականին հիշեցնել, որ Էլչիբեյի գաղափարախոսությունն ադրբեջանական ժողովրդի համար ոչ մի լավ բանի չհանգեցրեց՝ բացառությամբ հարևանների հետ հարաբերություններից զրկվելուց ու բարդեցումից:
Իրանը մեր մեծ հարևանն է, և կարծում եմ, որ անհաջող գաղափար է այդպիսի կասկածելի նախագծերում Ադրբեջանին ներառելը: Բացի այդ, ես ամերիկացի կոնգրեսականին խորհուրդ կտայի մանրամասն ուսումնասիրել սեփական երկրի պատմությունը: Ժամանակին Ստալինը փորձեց միավորել Ադրբեջանը, սակայն ԱՄՆ տվյալ ժամանակվա նախագահ Տրումենը չթողեց դա: Դրա համար էլ ես չեմ հավատում կոնգրեսականի ազնիվ մտադրությանը, ով իբրև թե մտահոգվել է ադրբեջանցիների ճակատագրով:
Երևում է՝ ամերիկացիները ցանկանում են Իրանը կործանել ներսից, ինչի համար էլ նրանք հիշել են ադրբեջանցիներին: Մեր երկրի ղեկավարությունը պետք է զգուշավորություն դրսևորի այդ հարցերում, այլապես մեր շահերին մեծ հարված կհասցվի: ԱՄՆ-ն տարածաշրջանում կասկածելի խաղ է տանում, և մենք չպետք է մասնակցենք այդ արկածախնդրություններին»:
