Ադրբեջանական Salam News գործակալության փոխանցմամբ՝ Թուրքիայի փոխվարչապետ Բեքիր Բոզդաղը երեկ կազմակերպված իֆթարից (ճաշկերույթ) հետո, մեկնաբանելով Սիրիայում տիրող իրավիճակը, հայտարարել է, որ Սիրիայում ընթացող զարգացումները նման են 21-րդ դարի նոր Քերբելային.
«Իմ ամենամեծ ցանկությունն այն է, որ Ռամադան ամսին համայն աշխարհում տիրի խաղաղություն ու անդորր: Սակայն երկրագնդի բազմաթիվ կետերում անցանկալի իրադարձություններ են տեղի ունենում: Այսօր Համայում, Հոմսում, Հալեպում և Սիրիայի այլ քաղաքներում ընթացող զարգացումները նման են նոր Քերբելայի: Պատկերացրեք, որ պետության ղեկավարը զենքն ուղղել է իր ժողովրդի դեմ և սպանում է նրան տանկերով, հրանոթներով ու ինքնաթիռներով: Դա նման է 21-րդ Քերբելային»:
Հիշեցնենք, որ Քերբելան Բաղդադից 100 կիլոմետր դեպի հարավ-արևմուտք ընկած քաղաք է, որին շիաները համարում են իրենց սրբավայրերից մեկը, քանի որ 680 թվականին այստեղ տեղի ունեցած ճակատամարտի ժամանակ խալիֆ Յազիդ 1-ինի զինվորները գլխատում են իմամ Հուսեյնին: Այս ճակատամարտը դիտարկվում է սուննիզմի ու շիիզմի տարանջատման մեջ:
