Հոկտեմբերի 5-ին Ադրբեջանում «ինքնասպան» եղած Մանվել Սարիբեկյանի հարազատները Կարմիր խաչից արդեն ստացել են Մանվելի մահվան վկայականը: Այդուամենայնիվ, հարազատները չեն հավատում, որ Մանվելը մահացել է: «Ես Կարմիր խաչի ներկայացուցիչներին ասացի` որ այս վկայականը տալիս եք, դուք հարյուր տոկոսով համոզվա՞ծ եք, որ Մանվել Սարիբեկյանը մահացած է, դուք տեսե՞լ եք նրա դին»,- մեզ պատմեց Մանվել Սարիբեկյանի մորաքույրը` Էմմա Բալյանը:
Տիկին Էմման պահանջել է Կարմիր խաչի հայաստանյան գրասենյակի աշխատակիցներից համապատասխան տեղեկանք գրել եւ ստորագրել, որ իրենք համոզված են Մանվելի մահվան մեջ, սակայն նրան տեղեկացրել են, որ Մանվելի դին Կարմիր խաչի աշխատակիցները չեն տեսել, իսկ մահվան վկայականն էլ ֆաքսով են ստացել:
Սարիբեկյանի մորաքույրը նաեւ տեղեկացրեց, որ Կարմիր խաչը դեռեւս սպասում է Ադրբեջանի եւ Հայաստանի պաշտպանության նախարարությունների համաձայնությանը, որպեսզի իրենք կարողանան վերադարձնել Մանվելի դին: Տիկին Էմման հուսով է, որ այսօր Աստրախանում կայանալիք Սարգսյան-Ալիեւ-Մեդվեդեւ հանդիպման ժամանակ այդ հարցը կքննարկվի, եւ ադրբեջանական կողմը կվերադարձնի Մանվելի դին: