Windows 7-ի հայերեն միջերեսի փաթեթն արդեն պատրաստ է: Այն միանգամայն անվճար կարելի է ներբեռնել այստեղից: Այս մասին «Առաջին լրատվական»-ի հետ զրույցում ասաց «Մայքրոսոֆտի» հայաստանյան գրասենյակի ղեկավար Գրիգոր Բարսեղյանը: «IT հասարակության ստեղծման տեսակետից, կարծում եմ, սա կարևորագույն ներդրում է մեր կողմից: Հասկանալի է, որ համակարգչից ու ինտերնետից օգտվելու համար ավելի լայն հասարակությունը որոշակի խնդիրների է հանդիպում` լեզվի հետ կապված: Կան մարդիկ, որ հայերեն գիտեն, անգլերեն չգիտեն, ռուսերենին էլ այնքան լավ չեն տիրապետում: Չես կարող պարտադրել, որ ողջ բնակչությունն անգլերեն իմանա: Սակայն այդ մարդկանց համար պետք է հասանելի լինեն տեխնոլոգիաներն ու IT արտադրանքը: Հատկապես կարևոր է այս խնդիրը մարզերի բնակիչների համար»,- նշեց Գ. Բարսեղյանը: Ինչ վերաբերում է MS Office 2010-ի հայերեն տարբերակին, ապա, ըստ Գ. Բարսեղյանի, այն պատրաստ կլինի այս տարվա առաջին եռամսյակի ընթացքում: «Լեզվաբանական մասն արդեն ավարտել ենք, ավելի շատ ուղղագրական բարելավումներ են արվում, փորձարկումներ են գնում, վերջնական տեխնիկական խնդիրներն են լուծվում: Այս տարվա առաջին եռամսյակում այն արդեն հասանելի կլինի: Ընդհանրապես, եթե նախկինում ժամանակային տարբերությունը նոր տարբերակի և հայկական տարբերակի միջև բավականին մեծ էր` մեկ-երկու տարի, ապա հիմա այն շատ ավելի փոքր է: Այսուհետ հայկական տարբերակները շատ ավելի հեշտ կլինի շուկա բերել»,- ասաց Գ. Բարսեղյանը: Նա նշեց նաև, որ աշխատանքներ են տարվում Internet Explorer-ի և այլ փաթեթների հայկական տարբերակներ ստեղծելու համար: «Հիմնականում խոսքը ամենամասսայական օգտագործման արտադրանքների մասին է»,- նշեց Գ. Բարսեղյանը:
