Երևանի Լալայանց 30 փողոցի բնակիչ Մարիամ Գիշյանը, ըստ ամենայնի, Ամանորը կդիմավորի Թուրքիայում, ուր նա մեկնել է ամիսներ առաջ: «Առաջին լրատվական»-ը նոյեմբերի 25-ին անդրադարձել էր, թե ինչպես է Մարիամ Գիշյանը տունը կորցնելուց հետո, ստիպված մեկնել Թուրքիա:Մարիամ Գիշյանի զավակները դժվարացան պատասխանել մեր հարցին` արդյոք Թուրքիա մեկնած իրենց մայրը կվերադառնա՞ Հայաստան, թե՞ ոչ: Հիշեցնենք, որ Երևանի Կենտրոն և Նորք-Մարաշ համայնքների առաջին ատյանի դատարանի` 2003 թ. կայացրած վճռով պետական կարիքների համար պետք է վերցվեր Մարիամ Գիշյանի գույքը, Երևան քաղաքի վարչական սահմաններում հատկացվեր չորս սենյականոց բնակարան` միջինացված շուկայական արժեքի սահմաններում կնքելով օտարման պայմանագիր, կամ էլ որպես փոխհատուցում տրվեր համարժեք գումար, որից հետո էլ նրան պետք է վտարեին: Սակայն արդարադատության նախարարության դատական ակտերի հարկադիր կատարման վարչության աշխատակիցները Մարիամին և նրա հինգ երեխաներին վտարում են բնակարանից` դրանով իրենց գործը համարելով ավարտված: Եվ մինչ Մարիամը բնակության պայմաններ է խնդրել Թուրքիայի իշխանություններից, «Պետական կարիքների զոհեր» հասարակական կազմակերպությունը շարունակում է պայքարել տուժած քաղաքացու իրավունքները վերականգնելու և նրան Հայրենիք, իր հինգ երեխաների մոտ վերադարձնելու համար: «Մարիամ Գիշյանի գործի վերաբերյալ մենք նամակով դիմել էինք Երևանի կառուցապատման ծրագրերի իրականացման գրասենյակ` պարզելու՝ նրան տրամադրվե՞լ է չորս սենյականոց բնակարան կամ էլ դրա դիմաց համարժեք փոխհատուցում, թե՞ ոչ: Եվ եթե չի տրվել, ապա ե՞րբ պետք է տրվի: Սակայն երկու ամսից ավելի է, ինչ մենք այդ գրասենյակից ոչ մի պատասխան չենք ստացել: Դա ևս մեկ անգամ ապացուցում է, որ Գիշյան Մարիամին փոխհատուցում չի տրվել»,- «Առաջին լրատվական»-ի հետ զրույցում ասաց «Պետական կարիքների զոհեր» հասարակական կազմակերպության ղեկավար Սեդրակ Բաղդասարյանը: Նա տեղեկացրեց, որ իրենց կազմակերպությունն օրեր առաջ հայցով դիմել է ՀՀ վարչական դատարան, որպեսզի վերջինս պարտավորեցնի Երևանի կառուցապատման ԾԻԳ-ին՝ տրամադրելու Մարիամ Գիշյանին վերաբերող փաստաթղթերը: Այդ փաստաթղթերի հիման վրա էլ, ըստ Սեդրակ Բաղդասարյանի, իրենք կկարողանան լիարժեք պաշտպանել Մարիամ Գիշյանի իրավունքները: Երբ «Պետական կարիքների զոհեր» հ/կ-ն դիմել է ԴԱՀԿ և պարզաբանումներ պահանջել, թե ինչո՞ւ չի կատարվել դատարանի` օրինական ուժի մեջ մտած վճիռը, պատասխանել են, որ փաստաթղթերի լուսապատճենները տրամադրել չեն կարող, քանի որ դրանք ոչնչացվել են 24.02.2010 թ. թիվ 26-Ա հրամանի համաձայն: Սեդրակ Բաղդասարյանը «Առաջին լրատվական»-ին հավաստիացրեց, որ իրենց կազմակերպությունը ցուցաբերելու է հետևողականություն, որպեսզի կարողանան վերականգնել արդարությունը և Մարիամին վերադարձնեն իր կորցրած բնակարանը:
