Ինչպես տեղեկացնում է թուրքական Hurriyet թերթը, Ստամբուլի ժամանակակից արվեստի թանգարանում ցուցադրվում են Ստամբուլում գործած ճարտարապետների կառուցած 100 լավագույն շենքերի լուսանկարները: Ցուցադրված են 40 ճարտարապետների գործեր, որոնք ապրել են այդ քաղաքում 19-րդ դարի վերջին և 20-րդ դարի սկզբին:
Ցուցադրությունը վերնագրված է «Ստամբուլի հայկական ճարտարապետությունը՝ վեստերնիզացիայի ժամանակաշրջանում»: Ցուցադրությունը կազմակերպել են «Ստամբուլ – 2010 եվրոպական մայրաքաղաք» մշակութային գործակալությունը, Ստամբուլի ժամանակից արվեստի թանգարանը, «Հրանտ Դինք» միջազգային հիմնադրամը և Ճարտարապետների ու ճարտարագետների համերաշխության ընկերակցությունը:
Ցուցահանդեսի համակարգող Լևենթ Չալիկօղլուն մամուլի ասուլիսի ժամանակ ասել է, որ ցուցահանդեսին ներկայացվել են քառասուն ճարտարապետների 100 մոռացված շինությունների լուսանկարներ` ավելացնելով, որ կրթական այս միջոցառումը նույնպես լույս կսփռի Ստամբուլի պատմության վրա։ Չալիկօղլուն ասել է, որ ճարտարապետ Հասան Քուրույազըջին կառուցել է շենքեր Ստամբուլի տարբեր փողոցներում՝ Քյուրթուլուշ, Պանգալտի, Թաքսիմ, Ջիհանգիր, Թառլաբաշի, Թյունել, Գալաթա, Էմինյունյու և Մահմուտպաշա:
«Ցուցահանդեսի այցելուները կտեսնեն նաև երկու կարճ ֆիլմ, որոնք կպատմեն այդ շենքերի մասին: Դրան զուգահեռ՝ Էրքալ Լևիին կազմակերպելու է քննարկում Ստամբուլի հայ ճարտարապետների մասին, իսկ այցելուները կարող են շենքերը դիտել զբոսավարների միջոցով»:
Ստամբուլի մշակութային գործակալության քարտուղարի տեղակալ Մեհմետ Գյուրկանը նշել է, որ հայ ճարտարապետները շատ գործ են արել նշված ժամանակաշրջանում: «Նրանցից են Բալյան եղբայրները, որոնք իրենց ձեռագիրն են թողել այնպիսի շինությունների վրա, ինչպիսիք են Չիրաղանը, Բեյլերբեյին և Դոլմաբահչե պալատը»:
Խոսելով Հրանտ Դինք հիմնադրամի անունից՝ Սիբել Ասնան ասել է, որ այս ցուցահանդեսը Ստամբուլի բնակիչներին կհիշեցնի մոռացված հայ ճարտարապետների և նրանց շինությունների մասին, և առաքելություն ունի հույս տալու, որ քաղաքի ուրվագիծը ձևավորող այդ շինությունները պաշտպանության տակ կառնվեն: Ասնան ասել է, որ շատ վերանորոգված շինություններ՝ Քյուլելի զինվորական դպրոցը, Հարբիյեի զինվորական դպրոցը, Օրթաքյոյի մզկիթը, Բյույուքադա նավահանգիստը, Բեյազիթ աշտարակը և Քադիքյոի Սյուրրեյա թատրոնը, կառուցվել են հայ ճարտարապետների կողմից:
