Մարտի 1-ի դեպքերն ուսումնասիրած ԱԺ ժամանակավոր հանձնաժողովի առաջարկությունների կատարման մոնիտորինգի զեկույցի քննարկման վերաբերյալ ԱԺ ՀՅԴ խմբակցության պատգամավոր Արծվիկ Մինասյանը «Առաջին լրատվական»-ի հետ զրույցում կարծիք հայտնեց, որ մոնիտորինգը «խաբկանք» էր: Ըստ նրա` մարտի 1-ի դեպքերն ուսումնասիրող հանձնաժողովը հսկայական առաջարկներով է հանդես եկել: Այդ առաջարկները եղել են երեք հիմնական ուղղությամբ` սոցիալ-տնտեսական ոլորտում, քաղաքական համակարգում և ժողովրդավարական արժեքներին միտված օրենսդրական, իրավակիրառական փոփոխություններ: «Մենք պետք է արձանագրենք, որ պետաիրավական հարցերի հանձնաժողովն անկարող է, անճարակ է այս մոնիտորինգը լիարժեք իրականացնելու: Կառավարությունը մարտի 1-ի դեպքերի ուսումնասիրության ժամանակավոր հանձնաժողովի առաջարկությունների կատարման ուղղությամբ լուրջ քայլեր չի արել: Եթե ասում են՝ ոստիկանական համակարգի բարեփոխումների ծրագիրը, ապա դա արվում էր նույնիսկ այն ժամանակ, երբ հանձնաժողովը իր վրա մոնիտորինգի ֆունկցիա չէր վերցրել: Եվ երրորդ արձանագրումը հետևյալն է. կանխարգելման տեսակետից կառավարության և քաղաքական մեծամասնության վարքագիծը դեռևս չի երաշխավորում նոր մարտի 1-ի ի հայտ գալու բացառումը»,- շեշտեց Արծվիկ Մինասյանը: