Այսօր թուրքական Today’s Zaman թերթը տեղեկացնում է այն զարգացումների մասին, որոնք առկա են Թուրքիայի հայկական համայնքում՝ կապված պատրիարքի ընտրությունների հետ:
Թուրքիայի հայկական համայքը հավաքել է մոտ 5000 ստորագրություն, որպեսզի իրավունք ստանա ընտրելու իր պատրիարքին, որը կփոխարինի հիվանդ պատրիարքի փոխարեն նշանակված տեղապահ պատրիարքին:
Իրենց նախաձեռնությունն անվանելով «Մենք ցանկանում ենք ընտրել մեր պատրիարքին»՝ խումբը հրավիրված մամուլի ասուլիսի ժամանակ ասել է, որ ցանկանում են ընտրել իրենց հոգևոր առաջնորդին, որը կներկայացնի իրենց համայնքը:
Հայկական պատրիարքությունը, որը գտնվում է Ստամբուլում, դիմել էր թուրքական կառավարությանը` խնդրելով աջակցել Մեսրոբ 2-րդ Մութաֆյանի հիվանդությունից հետո ստեղծված իրավիճակում: Հայկական համայնքը բաժանվել է երկու մասի. առաջին խումբը պահանջում է, որ անցկացվեն նոր ընտրություններ, մյուսը, այդուամենայնիվ, հակադարձում է սրան այն փաստով, որ սա դեմ է ավանդույթին, քանի որ նոր պատրիարք ընտրում են միայն նախորդի մահից հետո, իսկ Մութաֆյանը կենդանի է: Ինչևէ, հակասությունները համայնքում շարունակվում են:
Երկրորդ խումբը առաջարկեց նշանակել պատրիարքի փոխանորդ: Ի վերջո, երկու խումբն էլ դիմեցին կառավարությանը` հաստատելու համար «ընտրության կանոնակարգը» : Թուրքիայում գոյություն չունի օրենք կամ ենթաօրենսդրական ակտ կամ որևէ համակարգում այսօրինակ հարցերի համար: Թուրքիայի կառավարությունը դիմեց հայկական համայնքին` առաջարկելով նշանակել փոխանորդ, քանի որ նորի ընտրությունն անհնար է գործող պատրիարքի կենդանի լինելու պատճառով: Ի վերջո, Արամ Աթեշյանն ընտրվեց որպես Պոլսո հայոց պատրիարքության ընդհանուր փոխանորդ:
Խոսելով վերոնշյալ նախաձեռնության մասին՝ Հարութ Օզերն ասել է, որ պատրիարք ընտրելու իրավունքը վերցվել է իրենցից, չնայած հայկական եկեղեցական ավանդույթն ասում է, որ հոգևոր առաջնորդն ընտրվում է աշխարհիկների ձայների մեծամասնությամբ: Նախաձենող Թաթոս Բեբքն էլ նշել է, որ իրենք փորձել են խնդիրը լուծել համայնքի ներսում, սակայն երբ Աթեշյանը հրաժարվել է իրենց հետ խոսել, հրապարակայնացրել են գործընթացը: Taraf թերթի սյունակագիր Մարգար Եսայանն էլ ավելացրել է, որ ընտրելու իրենց իրավունքները խոխտվել են:
Նախաձեռնությունը հիմա որոշում է ընդունել դիմել վարչապետ Ռեջեփ Թայիփ Էրդողանին` բարձրաձայնելով իրենց պահանջը: «Մեր իրավունքը՝ ընտրելու մեր պատրիարքին, մեզնից խլել են, քանի որ «պատրիարքի ընդհանուր փոխանորդի» պաշտոնը ստեղծվել է հայկական եկեղեցու ավանդույթին հակառակ: Ժողովրդավարական և աշխարհիկ պետությունում մենք չենք կարող ընդունել այսօրինակ միջամտություն պատրիարքի ընտրության գործընթացում, սա հայկական համայնքի իրավունքն է, որը հիմնված է պատմական ավանդույթի վրա»,- ասված նախաձեռնության հայտարարության մեջ: