Ինչպես տեղեկացնում է ադրբեջանական Trend գործակալությունը, Ադրբեջանի նախագահ Ի.Ալիևը ելույթ է ունեցել խորհրդարանի չորրորդ գումարման առաջին նստաշրջանում: ԵԱՀԿ Աստանայի գագաթնաժողովից առաջ Ադրբեջանի նախագահը, փաստորեն, հերթական մեսիջն է ուղղել միջազգային հանրությանը:
Ի.Ալիևը նշել է, թե Ադրբեջանի խորհրդարանական ընտրությունները «հերթական կարևոր քայլն էին ժողովրդավարության զարգացման ճանապարհին», և հավելել, որ ընտրությունները անց են կացվել ժողովրդավարական սկզբունքներով ու ներկայացնում են ժողովրդի կամքը: Ապա գալով Ադրբեջանի վարած արտաքին քաղաքականությանը՝ նշել է, որ Ադրբեջանը շարունակելու է ջանքեր գործադրել տարածաշրջանում խաղաղության, անվտանգության, համագործակցության հաստատման ուղղությամբ. «Մենք անկախ պետություն ենք, և Ադրբեջանը առաջնորդվում է ժողովրդի կամքով: Մեր առջև ծառացած գլխավոր խնդիրը հայ-ադրբեջանական` ղարաբաղյան հակամարտությունն է: Մենք այդ ուղղությամբ մեծ ջանքեր ենք գործադրում, որպեսզի հարցը արդարացի լուծում ստանա` միջազգային իրավունքին համահունչ: Մինսկի խումբը արդեն 18 տարի է՝ գործում է անօգուտ: Արդյունք կլինի այն ժամանակ, երբ ադրբեջանական հողերը ազատագրվեն: Մենք ցանկանում ենք արդյունք տեսել: Մենք ցանկանում ենք, որպեսզի խնդիրը լուծվի միջազգային իրավունքի հիմքով, որպեսզի կատարվեն ՄԱԿ-ի ԱԽ-ի չորս բանաձևերը, ԵԱՀԿ-ի, ԵԽ-ի բանաձևերը: Եթե չկան դրանց իրականցման մեխանիզմները, եթե Հայաստանը անտեսում է միջազգային իրավունքի այդ նորմերը, իսկ միջազգային հանրությունը, իր հերթին, միջոցներ չի ձեռնարկում դրանց դեմ, այդ ժամանակ հարցը կարող է բարդանալ: Մենք հասկանում ենք, որ Հայաստանն այսօր փորձում է արհեստականորեն հարցը երկարաձգել` իրենց ցույց տալով որպես կառուցողական կողմ: Սակայն իրականությունն այն է, որ Հայաստանը վճռական պահերին ետ է կանգնում նախկինում ձեռքբերված պայմանավորվածություններից` դարձյալ առաջ քաշելով անիրականանալի առաջարկներ, որոնք անհնար է ընդունել»: Ի.Ալիևը նշել է, որ հույս ունի, թե այս խնդրով զբաղվող կառույցները, կողմերը, միջնորդները «վերջապես կասեն իրենց ծանրակշիռ խոսքը»: «Մենք հասկանում ենք, որ խոշոր պետությունները ցանկանում են խաղաղություն և կայունություն տարածաշրջանում, որպեսզի պատերազմ չլինի: Մենք էլ ենք դա ցանկանում: Բայց դա չի նշանակում, որ այս հարցը պետք է «սառեցված» մնա: Դա անհնար է… Ստատուս քվոն պետք է փոխվի»,- նշել է Ադրբեջանի նախագահը:
