«Հարություն առնելը Քրիստոսի մենաշնորհն է: Ինչքան էլ, որ մատաղ անեն ինձ կամ մեկ ուրիշ հանրապետականի, միևնույն է, ո՛չ մեռած Աստվածն է կենդանանում, ո՛չ էլ առավել ևս մեռած քաղաքական ուժը հարություն կառնի: Մենք մեռելապաշտ չենք, հետևապես մեղքերի աշխարհում գտնվող ՕԵԿ-ին մեր ժողովուրդը ձայն չի տա», – այս մասին մեզ հետ զրույցում ասաց արդեն նախկին պետ, դեռևս «Հանրապետական» կուսակցության անդամ, նախկին ՕԵԿ-ական Վռամ Գուրզադյանի հետ:
– ՀՀ քաղծառայության խորհրդի նախագահ Մանվել Բադալյանն ասում է, որ դուք անձամբ եք գրել, որ «պաշտոնական լիազորությունները անհարգի կերպով» չեք կատարել: Ստացվում է, որ ձեզ աշխատանքից հեռացնելու հարցում բողոքելու տեղ չունեք:
– Ես նման արտահայտություն ո՛չ ասել եմ, ո՛չ գրել եմ: Դա կնշանակեր, որ մեղավոր եմ, իսկ աշխատանքից ազատվելու դիմում պահանջողն էլ ինձ աշխատանքից ազատելով լավություն էր անում: Ես դա չեմ ընդունում: Դա կատարվել է նախարարի որոշումով, քաղծառայության խորհրդի համաձայնությամբ, որի մեջ նշվել է, թե տեսչության պետը անհարգի կերպով չի կատարել իր պարտականությունները:
– Այսինքն` դուք ձեր ձեռքով չէք գրել այդ մասին:
– Իրենք են տվել այդ որակավորումը և ստուգումներ անցկացրել: Ես այդ գործընթացին չեմ մասնակցել: Պարզապես այդ մասին վարչապետին չեմ էլ ահազանգել:
– Իսկ ո՞րն է պատճառը, որ չեք ահազանգել վարչապետին այդ մասին:
– Պատճառն այն է, որ օպերացիայի համակարգող մասնակիցները հոգնել էին իմ ու նախարարի 1.5 տարի ձգվող կոնֆլիկտից:
– Այս ամենը որքանո՞վ է առնչվում նոյեմբերի 4-ին վարչապետի սուր քննադատություններին, որոնք մի քանի նախարարությունների էին վերաբերում, այդ թվում` գյուղնախարարությանը:
– Վարչապետը, իմանալով իմ ու նախարարի 1.5 տարի ձգվող կոնֆլիկտի մասին, խորհրդակցությանը ինձ չհրավիրեց, որտեղ ես կարող էի հակափաստարկներ բերել, և համոզված եմ, որ այդ դեպքում նախարարը չէր կարողանա վարչապետին գցել թյուրիմացության մեջ: Վարչապետը շտապողաբար կայացրեց եզրակացություն, և բնական է, որ այս երկրում սխալը վարչապետը չպետք է լիներ, այլ ես:
– Դուք նշում եք, որ այս ամենը պայմանավորված է այն հանգամանքով, որ նախկին ՕԵԿ-ական եք եղել, իսկ ձեզ աշխատանքից ազատելու հրահանգը Արթուր Բաղդասարյանն է պատվիրել:
– Միանշանակ, Գերասիմ Ալավերդյանը նախարար դառնալու հենց երկրորդ օրվանից իմ առաջ անիրականանալի խնդիրներ է դրել: Ես միշտ ասել եմ, որ նախարարը հոգեկան հիվանդ է: Նա ցանկանում էր, որ ես իր շեղված «պրինցիպներով» աշխատեմ: Ես չէի կարող այսպես աշխատել: Նա ասում էր` թքած ունեմ օրենքի վրա: Օրենքը ես եմ, և դու իմ ցանկություններով պետք է աշխատես: Նախարարի նման մարդկանց այն սովխոզում, որտեղ աշխատել եմ, նաև ղեկավարել, երբ կադրը իր տեղում չէր, նմաններին ասում էին դամբուլ: Ես այս գյուղնախարարին իմ ընկերությունում նույնիսկ ղորողչի չէի ընդունի: Ղորողչին, գիտեք, ինչ է` դաշտերի պահակ, որ եթե հանկարծ էշը կամ ձին ընկնի ցանքսերի մեջ ղորողչին վազի և դուրս հանի: Բայց այսօր հանգամանքներն այնպես են դասավորվել, որ ՕԵԿ-ում լուրջ մարդ չկա, և սա է նախարարը: Պարզապես մեր իշխանությունների համբերության վրա եմ զարմանում: Ճիշտ հասկացեք, ես այդ քաղծառայողի աշխատավարձով չեմ ապրել, ես ֆերմեր եմ: Չասեմ համար մեկը, բայց լավագույն հինգի մեջ եմ: Եվ որպես ֆերմեր ամաչում եմ, որ մենք այսպիսի դամբուլ նախարար ունենք: Նա այն բացառիկ մարդկանցից մեկն է, որը Աստծու տեղը փողն է հարգում:
– Ստացվում է այնպես, որ վարչապետը, որը ձեր կուսակցությունից է, պաշտպանում է ոչ թե ձեր, այլ ՕԵԿ-ի շահերը: Եթե կարելի է, պարզաբանեք այս հակասությունը:
– Այդ պատճառով ասում եմ, որ ցանկացած նմանատիպ որոշման մեջ կա քաղաքականության մասնիկ: Հավանաբար գալիք ընտրություններում հանրապետականները ՕԵԿ-ի վրա «ստավկա» են անում` որպես դաշնակցի: Ցանկանում են սրանով ՕԵԿ-ը ուժեղացնեն` ցույց տալու համար, որ նրանք ուժեղ են և իրենց ցանկությանը հասնում են: Ավելին, ցանկանում են հասնել նրան, որ ՕԵԿ-ը կրկին կարողանա հայտնվել ԱԺ-ում: Բայց ես համոզված ասում եմ` հարություն առնելը Քրիստոսի մենաշնորհն է: Ինչքան էլ, որ մատաղ անեն ինձ կամ մեկ ուրիշ հանրապետականի, միևնույն է, ո՛չ մեռած Աստվածն է կենդանանում, ո՛չ էլ առավել ևս մեռած քաղաքական ուժը հարություն կառնի: Պարզապես չի կարող: Մենք մեռելապաշտ չենք, հետևապես մեղքերի աշխարհում գտնվող կուսակցությանը մեր ժողովուրդը ձայն չի տա: Մի անգամ մեր ժողովուրդը նման բան արել է. հանգուցյալ Կարեն Դեմիրճյանի որդուն` Ստեփան Դեմիրճյանին, ձայն է տվել: Այդ մի անգամն է եղել, երկրորդը չի լինի:
– Իշխանական ճամբարում խոսակցություններ են շրջանառվում, որ դուք սերտ հարաբերությունների մեջ եք ԲՀԿ հետ, հետևաբար հանրապետականները այս քայլով ցանկացել են ձեզ պատժել:
– Եթե ԲՀԿ ասելով` նկատի ունեն Սամվել Բալասանյանին կամ տիկին Ծառուկյան Ռոզային, որը մեր ֆերմերների միության նախագահն է, ես միշտ էլ իրենց հետ ունեցել եմ ջերմ, ընկերական, մարդկային հարաբերություններ: Եվ հանուն որևէ պաշտոնի ես այդ մարդկային հարաբերություններից չեմ հրաժարվի, իսկ «Հանրապետական» կուսակցությունում լավ գիտեն, որ ես ուղիղ մարդ եմ և երկու լարի վրա խաղացող չեմ: Հիմքը միայն դա չէ, եթե ուզում եք, ես ձեզ ուղիղ ասեմ` դուք էլ գրեք: Ուրիշներին չեմ ասել:
– Եվ ո՞րն է այդ հիմքը:
– Դեպուտատներից մեկի աղջիկը Գերմանիայից բերված թղթե բաժակների բիզնեսով էր զբաղվում: Եվ այդ բիզնեսմեն աղջիկը կոնֆլիկտ է ունեցել Զվարթնոցի տարածքի տեսուչի հետ: Այդ պատգամավորը Դավիթ Հարությունյանն է, որը այսօր սուրբ է, բայց իր նախարար եղած ժամանակ Աստված գիտեր, թե այդ նախարարությունում ինչ էր կատարվում: Դավիթ Հարությունյանը ելնելով իր անձնական-բիզնեսային հարաբերություններից` ներկայացրել է վարչապետին և նախարարին, թե իբր այս համակարգում մեծ փողեր են հավաքվում: Բայց ես երբ հանդիպեցի Դավիթ Հարությունյանին, ասեցի` Դավիթ, քո աղջկանից տեսուչը փող ուզե՞լ է, ասում է` գիտես ինչ, իմ աղջկա գործերը անում է «բրոկերը», իսկ նա ասում է, որ մեծ փողեր են ուզում: Բայց վերջին 3 անգամը աղջիկս է ձևակերպումներով զբաղվել, և քո տեսուչը շատ լավ է ընդունել նրան, բայց 4-րդ անգամ «նամյոկ» է արել, որ աղջիկ ջան, օրենքը պահանջում է գնանք-նայենք ապրանքը, կարող է լաբորատորիա ուղարկենք: Աղջիկն էլ ասել է, թե դու ինձանից փող ես ուզում: Իսկ տեսուչը պատասխանել է, թե քո նման սիրուն աղջկանից ինչպես կարելի է փող ուզել: Հիմա նաև սա է պատճառ դարձել: Բայց ես կարծում եմ, որ սա պատճառ չէր, այլ առիթ, որի հիման վրա չէր կարելի մարդուն աշխատանքից ազատել: Լիցենզիայի ստուգումների հետ կապված փակված թեման բացին, շուռ տվին իմ գլխին, որի հետ ես ոչ մի կապ չունեմ:
– Լավ ինչո՞ւ դուրս եկաք «Օրինացից»:
– Դուրս եկա այն ժամանակ, երբ իմ հարգարժան նախագահ Ռոբերտ Քոչարյանը հրապարակավ հայտարարեց, որ Արթուր Բաղդասարյանը դա-վա-ճան է: «Հանրապետական» ընդունվել եմ այն ժամանակ, երբ սկսել էր ընտրարշավը: Ես չեմ կարող ստվերում ման գալով ընտրություն անել: Իսկ ընտրվել եմ հանրապետական, որովհետև ես պետք է ընտրեի Սերժ Սարգսյանին:
– Այնուամենայնիվ, շարունակելո՞ւ եք մնալ «Հանրապետական» կուսակցությունում:
– Եթե չհեռացնեն, այո: Եթե ես դարձել եմ «Հանրապետական» կուսակցության վատ աշխատող քաղծառայող և հեռացվել եմ աշխատանքից, բնական է, որ կուսակցությունում էլ այդ հարցին պետք է անդրադառնան:
– Դուք նշեցիք, որ ստվերում չեք սիրում մնալ: Եթե հանկարծ հանրապետականները որոշեն ձեզ հեռացնել կուսակցությունից, հավանակա՞ն է, որ անդամակցեք ԲՀԿ-ին:
– Երբ գնան նման քայլի, ես հետագայում կմտածեմ` ԱԺ հաջորդ ընտրություններին որպես անկուսակցակա՞ն եմ մասնակցում, թե՞ գնում եմ որևէ կուսակցության մասնակցությամբ: Դա ապագայի խնդիր է, և այդ հարցին չեմ ցանկանա այսօր միանշանակ պատասխանել:
Լուսանկարները` Գագիկ Շամշյանի և «Ֆոտոլուր»-ի
