Աշխարհի խոշորագույն սոցիալական ցանց Ֆեյսբուքը անգլերեն «face» (դեմք) բառի պատենտը ստանալուց մի քանի քայլ հեռավորության վրա է գտնվում, հաղորդում է BBC-ն: Ինչպես հեռուստաընկերությանը հայտնել է Withers and Rogers իրավաբանական ընկերության` ապրանքային նշանների գծով մասնագետ Ֆիոնա ՄաքԲրայդը, Ֆեյսբուքը շուտով սահմանափակումներ կմտցնի «face» բառի օգտագործման մեջ` սոցիալական ցանցերի և համանման համացանցային ծառայությունների համատեքստում: Պատճառն, ըստ փորձագետի, այն է, որ օգտագործելով անվան հենց այդ բաղադրիչը` հիշյալ ոլորտի բազմաթիվ խաղացողներ են հայտնի դարձել:
Եթե ԱՄՆ պատենտների և ապրանքային նշանների գերատեսչությունը (USPTO) որոշում կայացնի գրանցել «face» բառը որպես ապրանքային նշան կոմերցիոն հեռահաղորդակցական ծառայություններում, ապա, մասնավորապես, խնդիրներ կարող են ծագել iPhone-ի Apple FaceTime տեսազանգային ծառայության համար:
Բացի այդ, $30 000-ով աճուրդով վաճառված Facemash.com-ի սեփականատերերը չեն կարողանա օգտագործել այդ անունը նոր հզոր սոցիալական կայք ստեղծելու նպատակով:
USPTO-ն դեռ այս հարցով որոշում չի կայացրել և խնդրել է ներկայացնել լրացուցիչ հիմնավորումներ: