«Եթե զուտ կոալիցիայի ձևաչափով համագործակցության մասին է խոսքը, ապա այս պահին նման քննարկում չի եղել: Բազմաթիվ առիթներով ասել եմ՝ նման քննարկում և որոշում չկա: Մենք պայմանավորվել ենք «եթե»-ներով չխոսել. այս պահին չկա, ես ասում եմ՝ գոյություն չունի»,- «Առաջին լրատվական»-ի հետ զրույցում ասաց «Ծառուկյան» խմբակցության պատգամավոր Գևորգ Պետրոսյանը՝ անդրադառնալով ՀՀԿ-ի հետ կոալիցիայի տեսքով համագործակցությանը:
Ինչ վերաբերում է «Ծառուկյան» խմբակցության խոստմանը՝15 մլրդ-ի ներդրումների մասին, մեր զրուցակիցն ասաց. «Պարոն Ծառուկյանը միշտ էլ նշանակալի ներդրումներ է կատարել Հայաստանի տնտեսության զարգացման գործում: Իսկ որպես աննախադեպ ներդրում՝ նա իրավացիորեն դա պայմանավորել էր 1-ին տեղը գրավելով, որովհետև այստեղ կա վստահության խնդիր՝ այդ օտարերկրյա ներդրումները պայմանավորված էին Ծառուկյան անձով»:
Գևորգ Պետրոսյանի համոզմամբ՝ ներդրումների հարցում Ծառուկյանը չի մրցակցում ոչ Կարեն Կարապետյանի, ոչ Սամվել Կարապետյանի հետ. «Ներդրումների հարցում ոչ մեկը չի կարող մրցակցել պարոն Ծառուկյանի հետ, որովհետև նա դա չի պայմանավորում միայն ընտրությունների արդյունքներով»:
Դիտարկմանը՝ ակնհայտ է, որ Սերժ Սարգսյանն է լինելու վարչապետը, գուցե այդ դեպքում Գագիկ Ծառուկյանը իր ներդրումները վստահի՞ Սերժ Սարգսյանին, պատգամավորը պատասխանեց. «Ես այդպիսի ակնհայտություն չեմ տեսնում և այդ թեմայով կոնկրետ դատողություն անելու անհրաժեշտություն չեմ տեսնում: Աստծո կամոք՝ կառավարության ձևավորումից հետո եթե ընդունելի լինեն մեր ծրագրերը, այն ժամանակ մեր կուսակցությունը՝ պարոն Ծառուկյանի գլխավորությամբ, կորոշի՝ որտեղ ինչ պիտանի քայլ անել»:
Ինչ վերաբերում է փողոցային պայքարին, ապա Գևորգ Պետրոսյանը հեղափոխության հիմքեր չի տեսնում. «Դա նրանց սահմանադրական իրավունքն է: Մենք ասել ենք, որ չենք համարում, թե առկա խնդիրները կարելի է լուծել փողոցային երթերի, հյուսիսային շրջաններից հարավային շրջաններ ման գալու, քարոզներ անելու միջոցով: Մենք կարծում ենք, որ առայժմ կան ավելի գործուն գործիքներ, և դրանց պիտանիությունը այնքան վիճելի չէ, որ մենք անցնենք փողոցային պայքարի»:
Մանրամասները՝ տեսանյութում:
