Երևանի քաղաքապետ Տարոն Մարգարյանը մարտի 19-ի ավագանու նիստի հարց ու պատասխանի ժամանակ վստահեցրեց, որ Երևանում հոկտեմբերին անցկացվելիք Ֆրանկոֆոնիայի գագաթաժողովը կանցկացվի բարձր մակարդակով: «Արդեն ստեղծվել է պետական հանձնաժողով, և մենք այնտեղ հստակ անելիքներ ունենք: Մեր բոլոր ծառայությունները օր ու գիշեր աշխատում են, որ Երևան քաղաքը պատշաճ տեսքի բերվի Ֆրանկոֆոնիայի գագաթնաժողովը բարձր մակարդակով անցկացնելու համար»,-ասաց Երևանի քաղաքապետը:
Տարոն Մարգարյանի խոսքով`Երևանի քաղաքապետարանում ստեղծվել է աշխատանքային խումբ` Երևանի քաղաքապետի առաջին տեղակալ Կամո Արեյանի գլխավորությամբ; «Գործընթացը հսկողության տակ է»,-հավելեց քաղաքապետը:
Ֆրանկոֆոնիայի 17-րդ գագաթնաժողովին կմասնակցեն շուրջ հինգ տասնյակ պետությունների և կառավարությունների ղեկավարներ, նախատեսվում է նաև Ֆրանկոֆոնիայի 31 գործընկեր կառույցների պատվիրակությունների մասնակցությունը։ Ակնկալվում է հարյուրից ավելի պատվիրակությունների ժամանում, ընդհանուր հյուրերի քանակը կազմելու է մինչև 4000 մարդ: Երկօրյա գագաթնաժողովի մեկնարկից երեք օր առաջ կայանալու է արտգործնախարարների համաժողովը, որին կնախորդի նաև մշտական խորհրդի նիստը: