2018 թվականի մարտի 11-ին տեղական ինքնակառավարման մարմինների հերթական ընտրություններ են անցկացվելու Արագածոտնի, Արարատի, Արմավիրի, Լոռու, Կոտայքի և Շիրակի մարզերի թվով 19 համայնքներում, և ավագանու անդամի արտահերթ ընտրություն` Տավուշի մարզի Ազատամուտ համայնքում: Նշված 20 համայնքներից չորսում կայանալու են միայն համայնքի ղեկավարի, 6 համայնքում` միայն ավագանու անդամի, և 10 համայնքում միաժամանակ անցկացվելու են համայնքի ղեկավարի և ավագանու անդամի ընտրություններ:
«Առաջին լրատվական»-ի հետ զրույցում ԿԸՀ նախագահ Տիգրան Մուկուչյանը նշեց, որ համայնքի ղեկավարի ընտրությունների հետ կապված մրցակցություն ակնկալել չի կարելի, որովհետև, հիմնականում, համայնքի ղեկավարի ընտրության պարագայում կա մեկ թեկնածու։
«Համայնքի ղեկավարներից ութը առաջադրված են ինքնառաջադրման կարգով, երկուսը ԲՀԿ-ի կողմից, ինը՝ ՀՀԿ -ի։ Իսկ ավագանու անդամի պարագայում ինքնառաջադրվել են 75 քաղաքացիներ՝ ինքնառաջադրման կարգով, ՀՅԴ-ի կողմից մեկ թեկնածու և ՀՀԿ-ի կողմից 62 թեկնածու»։
Նշենք, որ «Ելք»-ը ընտրություններին ո՛չ ավագանու, ո՛չ էլ համայնքի ղեկավարի թեկնածու չի առաջադրել։
Տիգրան Մուկուչյանն ասաց, որ չի կարող ասել, թե ինչով է պայմանավորված մրցակցության բացակայությունը, օրենքով առաջադրումների համար տրվում են լայն հնարավորություններ, մնացածը ԿԸՀ գործառույթի մեջ չի մտնում։
Մանրամասները՝ տեսանյութում։