Մենք շատ լուրջ ենք վերաբերում ԱՄՆ ազգային հետախուզության պետի համաշխարհային սպառնալիքների վերաբերյալ գնահատական-հաշվետվությանը, որտեղ նշվում է, որ 2018-ին հնարավոր է Ղարաբաղում լայնածավալ պատերազմ սկսի, որովհետև հասկանալի է, որ ԱՄՆ-ը հետախուզական բազմաթիվ տեղեկություններ ունի: Այդ մասին «Առաջին լրատվական»-ի հետ զրույցում նշեց ԼՂ ԱԺ փոխնախագահ Վահրամ Բալայանը:
Նրա խոսքերով՝ մյուս կողմից դա իրենց համար նորություն չի, որովհետև նման բան լսել են նաև նախորդ տարի, բացի այդ, ըստ Բալայանի, Արցախում ապրող հանրությունը քաջ գիտակցում է, որ ամեն րոպե, իսկապես, կարող է լայնածավալ ռազմական գործողություններ սկսվել: Հանրությունը դրան պատրաստ է, իսկ պետական մարմինները համարժեք քայլեր են կատարում, այդ թվում՝ բանակի ամենօրյա հզորացում, նոր ռազմատեխնիկայի ձեռքբերում, տեսանելիության սարքերի, հետախուզական նոր տվյալների ձեռքբերում:
«Կարծում եմ՝ հանրությունը պետք է հանգիստ լինի, որովհետև 200 կմ-անոց սահմանի վրա իսկապես ձևավորված բանակ գոյություն ունի, որը պատրաստ է արժանի հակահարված տալ թշնամուն: Դրա մասին է վկայում 2016-ի ապրիլյան իրադարձությունները, ընդ որում՝ այն ժամանակ ամբողջ բանակը չէր գործընթացի մեջ մտել»- ասաց նա:
Ինչ վերաբերում է Ալիևի հայտարարությանը, թե «վերադարձնելու են» Երևանն ու Զանգեզուրը, և ինչու իշխանությունները գրեթե որևէ կերպ դրան չարձագանքեցին, Բալայանը նշեց. «Այնքան անլուրջ էր այդ հայտարարությունը… բոլորը քաջ գիտակցում են, որ դա ներքին լսարանի համար է, որտեղ Ալիևը պետք է ներկայանա որպես ուժեղ տղա, որ կարող է բոլոր հարցերին լուծում տալ, այդ թվում՝ նվաճել Երևանն ու Զանգեզուրը: Այդ զառանցանքը մենք ամեն օր լսում ենք»։
Ամբողջությամբ՝ տեսանյութում: