Չինաստանի Ցինչեն էլիտար բանտում, որտեղ պահվում են փոխնախարարի և ավելի բարձր պաշտոններ զբաղեցրած պաշտոնյաները, այլևս տեղ չկա կոռումպացված պաշտոնյաների համար՝ գրում է South China Morning Post-ը:
Բանտի վարչակազմը համարում է, որ բանտարկյալների թիվը հնարավոր է՝ աճի: Բանտի գերհագեցվածության պատճառով բանտարկյալներին զրկել են հարազատների հետ հանդիպելու և ընտանեկան ընթրիքների հնարավորությունից: Չինական Ամանորի կապակցությամբ 60 և ավելի տարիք ունեցող բանտարկյալները կարող էին ընթրել ընտանիքի անդամների հետ:
Բանտը գտնվում է Պեկինի հյուսիսային արվարձանում՝ լեռան ստորոտում: Այնտեղ բանտարկված է եղել նաև Մաո Ցզեդունի այրին, Ժողովրդական կոնգրեսի նախկին նախագահը, Պեկինի և Շանհայի կուսակցական գործիչներ:
Ժամանակակից Չինաստանում ստեղծվում է Ազգային վերահսկողության հանձնաժողով՝ լիազորությունների լայն շրջանակով: Հանձնաժողովի անդամները կարող են հարցաքննություններ իրականացնել, հաշիվներ սառեցնել, ձեռնարկություններ փակել, խուզարկություններ անցկացնել և բանտարկել կոռուպցիայի մեջ կասկածվողներին մինչև դատարանի որոշումը: