Երևանի կիսակառույց շատ շենքերի շինարարություններ արդեն սկսված են: Իսկ Կայարանի մերձակայքում գտնվող կիսակառույց շինության քանդման աշխատանքները կմեկնարկեն շուտով: Լրագրողների հետ հանդիպմանն այս մասին ասաց Քաղաքաշինության պետական կոմիտեի նախագահ Նարեկ Սարգսյանը:
«Աբովյան փողոցի կիսակառույց շենքի շինարարությունն արդեն ընթացքի մեջ է: Այդ շենքում պետք է հյուրանոց լինի: «Դվին» հյուրանոցը ևս ակտիվ շինարարության փուլում է: Կայարանի մոտակայքում գտնվող կիսակառույց շենքի շինարարությունը պատվիրատուի առողջական խնդիրների պատճառով դեռ ձգձգվում է»,-ասաց Սարգսյանն ու հավելեց, որ նախագծային աշխատանքներն ակտիվորեն չեն ընթանում:
Սակայն ինչպես Սարգսյանը փաստեց՝ իրեն խոստացել են՝ քանդման աշխատանքները կսկսեն փետրվարի 26-ից: Հստակ նախագիծը կլինի մի քանի ամիս հետո միայն, սակայն այդ հատվածում նախատեսված է կառուցել երեքից բարձր աստղանի հյուրանոց: Կլինի նաև առևտրային հատված, բիզնես կենտրոն: Ներդրումների ծավալը գերազանցելու է 60 մլն դոլարը:Ներդրողը Լիբանանի քաղաքացի է՝ ազգությամբ ոչ հայ:
«Ես նրան խնդրել եմ, որ նախագծի մեջ նկատի ունենան նաև նախկինում գործող «Սասունցի Դավիթ» կինոթատրոնը և դրա վերակառուցման խնդիրը»,-եզրափակեց կոմիտեի նախագահը:
