Ռուսաստանն օտարերկրյա ռազմական պայմանագրեր է կորցրել՝ պատժամիջոցների միջոցով ԱՄՆ-ի հակառակորդներին հակազդելու մասին օրենքի գործողության պատճառով։ Կորսված գործարքների ընդհանուր արժեքը գնահատվում է ավելի քան 3 մլրդ դոլար։ Այս մասին հայտնել է Պետդեպի խոսնակ Հիզեր Նաուերթը։
«Մեր հարյուրավոր մարդիկ աշխատում են ողջ աշխարհում ամեն օր՝ պատժամիջոցների համատեքստում, և ոչ միայն Պետդեպից, այլև Ֆինանսների նախարարությունից և այլ գերատեսչություններից…Որոշ երկրներ դադարեցրել են որոշակի ապրանքների գնումը»,-նշել է Նաուերթը։
Նրա խոսքով՝ ԱՄՆ-ը կապ է հաստատում գործընկեր երկրների հետ, որոնք պայմանագրեր ունեն Ռուսաստանի հետ՝ նախազգուշացնելու օրենքի գործողության մասին։ Այդ օրենքը նախատեսում է սահմանափակում Ռուսաստանի հետ այլ երկների համագործակցության համար, մասնավորապես պաշտպանության և հետախուզության ոլորտներում։
Պետքարտուղար Ռեքս Թիլերսոնը հայտարարել է, որ ԱՄՆ-ն ուսումնասիրում է պատժամիջոցային ցուցակում Ռուսաստանի հերթական ներկայացուցիչներին ներառելու հնարավորությունը։