Հանրային քաղաքականության ինստիտուտի տնօրեն, կրթության փորձագետ Արևիկ Անափիոսյանը կարծում է, որ «Բարձրագույն կրթության մասին» օրենքը պետք է միջավայր ստեղծի մի քանի կարևոր հարցերի հետ կապված, ինչը, սակայն, նրա դիտարկմամբ՝ չի ապահովվում։
«Պետք է ապահովվի բուհերի անկախությունն ու ապաքաղաքականացվածությունը, պետք է հնարավորություն տալ ակադեմիական ազատությունների և քննական մտածողության զարգացման համար, պետք է կարևորվի դասախոսական անձնակազմի դերը բարձրագույն կրթության ոլորտում և ստեղծի միջավայր, որտեղ զարկ կտրվի գիտությանը․ այս բոլոր ոլորտներում մենք այսօր ունենք բավականին խնդիրներ և ես մտահոգություններ ունեմ, որ այս օրենքի նախագծով վերոնշյալ կետերի միջավայրի ապահովումը չի իրականացվում։
Բուհերի ապաքաղաքականացվածության հետ կապված օրենքի նախագծում կա կետ, որտեղ ասվում է, որ կառավարման խորհուրդները հաստատվելու են վարչապետի կողմից, այսինքն՝ անձնակազմ, որն իսկապես վիճահարույց է՝ թե անկախության, թե քաղաքականացվածության տեսանկյունից, բացի սրանից, եթե խոսում ենք ակադեմիական ազատության մասին, ապա չկան մեխանիզմներ, որոնց միջոցով հնարավոր կլիներ ապահովել ակադեմիական ազատությունը, հաջորդը՝ բարձրագույն կրթության և դրա որակի մասին խոսելիս՝ պետք է ուշադրություն դարձնենք նրան, որ այդ որակը հնարավոր է ապահովել ուսումնառության և դասավանդման մակարդակում, որտեղ պետք է կարևորենք ուսանողին և դասախոսին, սակայն այս օրինագծի վերլուծություններից հետո տպավորություն ստացա, որ այս օրինագծով ևս չունենք դասախոսին կարևորելու հետ կապված միջավայրի ստեղծում և դրա հետ մեկտեղ կա սահմանափակում, որ 70 տարին լրացած դասախոսները բուհ-ում չեն կարող զբաղեցնել վարչական պաշտոններ՝ ամբոնի վարիչ, ֆակուլտետի դեկան կամ համալսարանի ռեկտոր, ինչ ևս չենք կարող միանշանակ դրական կամ բացասական գնահատել»,- «Առաջին լրատվական»-ի հետ զրույցում ընդգծեց Արևիկ Անափիոսյանը։
Վերջինս այս համատեքստում մտավախություն հայտնեց, որ այս օրինագծով բուհերում քաղաքականացվածությունն ու հիպերկենտրոնացվածությունն ուժեղանալու է և ավելանալու է ակադեմիական ազատության վերահսկողությունը։
Հիշեցնենք, որ եթե ընդունվի «Բարձրագույն կրթության մասին» օրենքի նոր նախագիծը, որն արդեն Ազգային ժողովում է, ապա 70 տարին լրացած անձանց չի թույլատրվելու զբաղվել գիտամանկավարժական գործունեությամբ կամ ավելի ճիշտ սահմանափակվելու է այդ հնարավորությունը, ինչը ոլորտի ներկայացուցիչների շրջանում լուրջ դժգոհությունների ու մտահոգությունների տեղիք է տվել:
Շուրջ երկու տասնյակ գիտնական-մանկավարժներ նույնիսկ բաց նամակով դիմել են ԱԺ նախագահ Արա Բաբլոյանին՝ փորձելով կանխել այդ դրույթի կյանքի կոչումը՝ ընդգծելով, որ դա իրավաչափ չէ ու հակասում է մարդու իրավունքներին:
Մանրամասները՝ տեսանյութում։
