Վրաստանի վարչապետ Գիորգի Կվիրիկաշվիլին կառավարության նիստում հայտարարել է, թե Վրաստանը մտադիր է հայտ ներկայացնել` 2030-ի ձմեռային օլիմպիական խաղերը հյուրընկալելու համար: Վարչապետը նախարարներին հանձնարարել է` խնդրի հետ կապված նախապատրաստել առաջարկություններ, որովհետև արդեն մոտ ապագայում Թբիլիսի են ժամանելու ՄՕԿ-ի փորձագետները` խոշոր մարզական միջոցառում անցկացնելու Վրաստանի հնարավորությունները ուսումնասիրելու նպատակով:
2030-ի ձմեռային օլիմպիադան հյուրընկալելու մտադրության մասին Կվիրիկաշվիլին առաջին անգամ հրապարակավ հայտարարել է հունվարի վերջին, երբ Շվեյցարիայում հանդիպում ունեցավ ՄՕԿ նախագահ Թոմաս Բախի հետ, ով անմիջապես խոստացել էր փետրվարի վերջին Վրաստան գործուղել կազմակերպության փորձագետներին: Ի դեպ, Վրաստանի հայտն ունի կոնկրետ ինստիտուցիոնալ հիմք, որովհետև երկրում արդեն գործում են լեռնադահուկային վեց ժամանակակից կուրորտներ, որոնք գրավում են շատ եվրոպացիների` սպասարկման մատչելի գներով, մաքուր էկոլոգիայով, գեղեցիկ տեսարաններով և իհարկե` վրացական խոհանոցի համեղ ուտեստներով:
Գիորգի Կվիրիկաշվիլին հայտարարել է, թե իրենք ունեն հավակնոտ պլան, որը կարճ ժամանակահատվածում նպաստելու է Վրաստանի արագ զարգացմանը: 2030-ի օլիմպիադայի անցկացման ձգտումը պաշտոնական Թբիլիսիին համարում է ռազմավարական խնդիր. եթե վրացական հայտը հաղթի, դա կնպաստի հազարավոր աշխատատեղերի բացմանը, օտարերկրյա ներդրումների ծավալի մեծացմանը, տուրիզմի և դրա հետ կապված ենթակառուցվածքների զարգացմանը:
Միխեիլ Սաակաշվիլիի բարեփոխումների շնորհիվ Վրաստանում ձևավորվել է միանգամայն նոր որակի պետություն` եվրոպական մտածողությամբ ու հավակնություններով: Այս ամուր հիմքն էլ նպաստում է, որ մեր հարևան ու բարեկամ երկիրը հանդես գա նոր հավակնոտ ծրագրերով` մեծացնելով իր միջազգային սուբյեկտությունը ու հավակնելով տարածաշրջանային լիդերության` առնվազն զարգացման պոտենցիալի, քաղաքակրթական մակարդակներում:
Ի դեպ, ՄՕԿ-ը վերջին տարիներին վարում է, այդպես կոչված, աշխարհագրական «էքսպանսիայի» քաղաքականություն, ինչը մեծացնում է հավանականությունը, որ 2030-ի ձմեռային օլիմպիադան իսկապես կարող է հյուրընկալվել Վրաստանում: