Բրիտանացի ուսանող Գրեգ Հյուզը հայտարարել է, որ Apple-ի iOS 5 նոր օպերացիոն համակարգի Wi-Fi Sync հավելվածն իր կողմից ստեղծված ծրագրի անվանման և գործիքի կրկնօրինակն է: Նա ասել է, որ իր ստեղծած ծարգիրը թողարկվել է apple-ի օպերացիոն համակարգի թողարկումից մեկ տարի առաջ:
2010թ. ստեղծված Wi-Fi Sync-ը Հյուզն առաջարկել էր Apple-ի App Store ինտերնետային խանութին: Հյուզի ծրագիրը թույլ էր տալիս սինխրոնիզացնել iPhone հեռախոսը iTunes-ի գրադարանի հետ: Սակայն այն ժամանակ Հյուզին մերժել էին՝ ասելով, որ App Store-ում Հյուզի ծրագրի տրամադրման մերժումը պայմանավորված է անվտանգության խնդիրներով:
Այնուհետև Հյուզn իր ծրագիրը ներկայացրել էր Cydia ինտերնետ խանութ, որտեղ տեղադրվում են «կոտրված» iPhone սմարթֆոնների համար ծրագրերը: Շատ կարճ ժամանակ անց Հյուզի Wi-Fi Sync-ը մտավ ամենապահանջված ծրագրերի շարքի մեջ. 13 ամսվա ընթացքում վաճառվել է Wi-Fi Sync-ի 50 հազար օրինակ:
Հյուզը շատ է զարմացել, երբ հունիսի 6-ին թողարկված iOS 5 օպերացիոն համակարգի մեջ տեսել է իր ծրագիրը, որի կոճակը ոչնչով չի տարբերվում իր ստեղծածից:
