Դավոսի համաշխարհային տնտեսական ֆորումին մասնակցելու նպատակով Շվեյցարիա մեկնած վարչապետ Կարեն Կարապետյանը հանդիպել է շվեյցարացի գործարարներին և նրանց հրավիրել է Հայաստան ներդրում անելու: Կարեն Կարապետյանը կրկնել է արդեն հայտնի «թեզերը» Հայաստանում էական փոփոխությունների, բիզնես միջավայրի գրավչության, Իրանի հետ Ազատ առևտրի գոտու, ԵՏՄ 180 միլիոնանոց շուկայի և կամրջային դերակատարության մասին: Դա ինչ-որ բան կասի՞ շվեյցարացի գործարարներին, թե՞ ոչ՝ մեղմ ասած անորոշ է: Ավելին, անորոշ է ոչ միայն այն, թե ինչ է ասում Կարապետյանը, այլ նաև այն, թե ով է ասում: Ասում է իհարկե Կարապետյանը, բայց նա մի քանի շաբաթ առաջ ինքն էր ասում, որ անորոշությունը 2018-ի ապրիլի հարցում խանգարում է ներդրողների հետ աշխատանքին:
Ըստ այդմ, ներդրողները՝ լինեն շվեյցարացի, թե այլ պետության ներկայացուցիչ, առաջին հերթին պետք է որ հետաքրքրվեն՝ իսկ Կարեն Կարապետյանը երաշխավորո՞ւմ է իր խոսքի քաղաքական հենքը, թե՞ ոչ: Սերժ Սարգսյանը, օրինակ, Կարեն Կարապետյանի խոսքերի քաղաքական հենք չի երաշխավորում, և չի երաշխավորում բարձրաձայն: Ինչ մարտավարական կամ այլ խնդիր է դրված այդ իրավիճակի տակ, այլ հարց է: Բայց եթե կա այդպիսի կուլիսային որևէ գործոն, ապա դա նշանակում է, որ Կարեն Կարապետյանը պետք է նաև կուլիսներում շփվեր շվեյցարացի գործարարների հետ նրանց հարցերը փարատելու համար: Ու թերևս դա վերաբերում է Դավոսում նրա բոլոր շփումներին: Ըստ այդմ, անորոշության խանգարող հանգամանք լինելու մասին նրա հայտարարությունից հետո, մեղմ ասած, հարց է առաջանում՝ Դավոսի համաշխարհային տնտեսական ֆորումին Կարեն Կարապետյանի մասնակցությունը այսպես ասած հրապարակային տնտեսա-քաղաքակա՞ն, թե՞ կուլիսային նշանակություն ունեցող իրադարձություն է:
Կարապետյանը հայտարարել է, որ լինելու են երկկողմ բազմաթիվ հանդիպումներ, այդ թվում ոչ միայն բիզնեսի, այլ նաև Դավոս ժամանած տարբեր երկրների ղեկավարների հետ: Ըստ այդմ հարց է առաջանում, հանդիպումները լինելու են հրապարակայի՞ն, թե՞ կուլիսային, կամ արդյո՞ք մի մասը կլինի հրապարակային, իսկ մյուս մասը՝ կուլիսային: Այս ամենում սակայն, երևի թե, առանցքային նշանակություն ունեցող, կամ ցուցիչ հանդիսացող կլինի այն, թե արդյո՞ք Կարեն Կարապետյանի հանդիպումների օրակարգում կա հանդիպում Ֆրանսիայի նախագահ Մակրոնի հետ:
Այս իրողության ինտրիգը կամ առանձնահատկությունը ոչ միայն այն է, որ Հայաստանն ու Ֆրանսիան եվրոպական ուղղությամբ ունեն փոխհարաբերության առանձնակի մակարդակ, և Ֆրանսիան ունի պարզապես Հայաստանի եվրաատլանտյան պրովայդերի իմաստ կամ կարգավիճակ, այլ նաև այն, որ Մակրոնն այսօր Փարիզում ընդունել է Սերժ Սարգսյանին, իսկ հետո նա էլ լինելու է Դավոսում և, ըստ այդմ, շատ հետաքրքիր կլինի՝ կհանդիպի՞ Մակրոնը Դավոսում Կարեն Կարապետյանին, թե՞ կբավարարվի Փարիզում Սերժ Սարգսյանի հետ հանդիպումով: