«Դա շատ ողջունելի գաղափար է և, եթե այն արդեն քննարկվել է հանրապետության նախագահի ու կառավարության անդամների հետ, ապա կարծում եմ լուրջ պլաններ կան այս առումով ու դրանից լուրջ օգուտներ կլինեն», – «Առաջին լրատվական»-ի հետ զրույցում նշեց «Ինսթիգեյթ մոբայլ» կազմակերպության ղեկավար Արտակ Չոփուրյանը`անդրադառնալով Հայաստանում «Սիլիկոնյան հովիտ» ստեղծելու գաղափարին։
Հիշեցնենք, որ «Հայկական բլոկչեյն համաժողով» (Armenian Blockchain Forum, ABF) ընկերությունը նախատեսում է Հայաստանում ստեղծել տեխնոլոգիական կլաստեր, որը կդառնա հայկական «Սիլիկոնյան հովիտ»-ը։
Ինչպես հայտնում է ABF ընկերության մամուլի ծառայությունը, 2017թ. դեկտեմբերի 20-ին ABF ներկայացուցիչները ՀՀ նախագահ Սերժ Սարգսյանին և կառավարության աշխատանքային խմբի անդամներին են ներկայացրել այս նախաձեռնության ծրագիրը:
ՀՀ կառավարության և ABF-ի միջև կայացած հանդիպման արդյունքում հաստատվել է Հայաստանում Ազատ տնտեսական գոտու (ԱՏԳ) ստեղծման գաղափարը: Նոր կլաստերի հիմնական խնդիրն է լինելու աշխարհի տարբեր երկրներից բարձր տեխնոլոգիական նախագծերի զարգացման համար Հայաստանում յուրահատուկ ենթակառուցվածքի կազմակերպումն ու կարգավորումը: Կլաստերի ստեղծման առաջին փուլով (նախատեսված է 2018թ. առաջին կիսամյակում) ծրագրվում է միջազգային աքսելերատորի բացումը, որը հարթակ կդառնա ամբողջ աշխարհից նորարարական նախագծերի գործարկման և զարգացման համար, ինչպես նաև ԱՏԳ տարածքում տեխնիկական տարածքների եւ տվյալների բազաների ստեղծումը, որոնք ուղղված կլինեն ապակենտրոնացված տեխնոլոգիաների ցանցի գործարկմանն ու աջակցմանը: Այս համատեքստում մեր զրուցակիցը հավելեց. «Սա կբերի Սիլիկոնյան հովտի ձևավորմանը, թե չէ` ցույց կտա ժամանակը, բայց նշեմ, որ սա մի քայլ է, որը կօգնի հասնել դրան, սակայն մյուս կողմից էլ պետք է նաև նկատի ունենանք, որ Սիլիկոնյան հովիտ չի ստեղծվում միայն մեկ ընկերության կողմից, այլ դա բավականին լուրջ էկոհամակարգ է, որը լուրջ աշխատանքներ է պահանջում, ինչի արդյունքում հնարավոր կլինի նաև մեծ ներդրումներ բերել Հայաստան. ամբողջ գաղափարն այն է, որ պետք է ստեղծվի ինչ-որ հարթակ, որտեղ և միջազգային ներդրողները և հայկական ՏՏ ընկերությունները և ընդհանրապես տեխնոլոգիական ուղղվածություն ունեցող կազմակերպությունները կկարողանան միասին աշխատել, այսինքն ` խոսքը վերաբերում է բլոկ-շղթաներին, որը բավականին արդիական է և շատ ինդուստրիաներում կիրառելի»։ Մանրամասները` տեսանյութում։