Երեկ ՄԱԿ-ի Գլխավոր ասամբլեան ընդունել է բանաձև՝ ԱՄՆ-ին կոչ անելով հետ կանգնել Երուսաղեմը Իսրայելի մայրաքաղաք ճանաչելու որոշումից: Բանաձևին կողմ է քվեարկել 128 երկիր, այդ թվում՝ Հայաստանը:
«Առաջին լրատվական»-ի հարցին՝ ավելի նպատակահարմար չէ՞ր լինի, որ Հայաստանը ձեռնպահ քվեարկեր՝ հաշվի առնելով այն հանգամանքը, որ սա Թուրքիայի նախաձեռնությունն էր, միջազգայնագետ Սուրեն Սարգսյանը պատասխանեց. «Կարծում եմ՝ չարժե առաջնորդվել այդ սկզբունքով, որովհետև դա ոչ միայն Թուրքիայի, այլև Եմենի նախաձեռնությունն էր, որին միացել են տասնյակ այլ երկրներ»:
Մեր զրուցակցի խոսքով՝ քվեարկությանը Հայաստանի «կողմ» ընտրությունը պայմանավորված է եղել տասնյակ հանգամանքներով. «Կարծում եմ, որ սա ինքնուրույն կայացրած որոշում էր, հազիվ թե այս հարցում մեզ վրա ճնշումներ եղած լինեն: Հայաստանի այս դիրքորոշումը, կարծում եմ, բխում է մեր պետության շահերից»:
Հարցին՝ արդյո՞ք ԱՄՆ-ը հետ կկանգնի այս որոշումից, միջազգայնագետը պատասխանեց. «Գոնե այս նախագահի օրոք չեմ կարծում, որ ԱՄՆ-ը հետ կանգնի իր որոշումից: Բացի այդ, ՄԱԿ ԳԱ-ի բանաձևը իրավաբանական ուժ չունի»:
Այնուամենայնիվ, մեր զրուցակիցը սա համարում է պատմական իրողություն, որովհետև ըստ էության շրջանցվեց ՄԱԿ-ի Անվտանգության խորհրդում ԱՄՆ-ի կողմից վետո դրված բանաձևը. «Սա ՄԱԿ-ի պատմության 70 տարիների ընթացքում 11-րդ դեպքն է»:
Մանրամասները՝ տեսանյութում:
