Գերագույն խորհրդի պատգամավոր Ազատ Արշակյանը կարծում է, որ հերթական ահաբեկչական փորձի նախապատրաստման պատճառը 20 տարի ժողովրդավար, մրցակցային իշխանափոխություն չունենալն է։ «Առաջին լրատվական»-ի հետ զրույցում ԳԽ պատգամավորն ընդգծեց, որ ո՛չ հասարակությունը, ո՛չ իշխանությունը «Դրո»-ի,« Հոկտեմբերի 27»-ի, «Սասնա ծռեր»-ի, «Նորքի խմբի» գործերից դասեր չեն քաղել։ Նրա դիտարկմամբ՝ դասեր չեն քաղվել նաև պատմության այլ դրվագներից։
«Դեռևս 19-րդ դարի նարոդնիկական շարժումը, տեռորիզմը, իշխանափոխության միակ ձևը՝ ռուսական նաև, այլ իմպերիաներում, որտեղ, որ իշխանությունը ժառանգական էր և ժամանակակից չէր։ Ընդհանրապես՝ երկրի միահեծան տերը, ինչպես Ռուսաստանում ցարերն էին, դա ոչ միայն հետադիմություն էր, զուտ մարդկայնորեն նաև վիրավորական էր։ Այն բոլոր գրոհները, որոնք եղել են ռուսական իմպերիայի դեմ, ոմանք նաև հաջողված, մեր համար պետք է դաս լինեին, որ ճիշտ ժամանակին ժողովրդավարական ինստիտուտները կայացնեինք, և ապահովեինք ժողովրդավարական, ազատ, մրցակցային իշխանափոխություն։ Մարգինալների գաղափարախոսություն կա․ առիթ ունեն՝ իշխանափոխություն չի լինում, կատաստրոֆիկ վիճակ է»։
Ըստ նրա՝ չարիք է և՛ իշխանափոխություն չապահովելը, և՛ ուժով, բռնությամբ դրան հասնելը, իշխանությունը յուրացվել է, բայց ուժի կիրառումն ընդունելի չէ։
«Հայրենասիրությունը ուրիշ բան է, այն խրամատներում է դրսևորվում, հայրենասերները, սպաները, զինվորները և սերժանտները, նրանք ակնհայտորեն պաշտպանում են և սիրում են հայրենիքը, մնացած բոլոր բացատրությունները հայրենիքի մասին տեղին չեն, հայրենասեր ասելով՝ քանդում են, կործանում են հայրենիքը, գնդակահարում են, դա հայրենասիրություն չէ։ Եթե հանուն արդարության, սահմանի վրա չեն ծառայում, դա հայրենասիրություն չէ, քաղաքացիական պարտքի այլ դրսևորում կարող է լինել։ Ես կարծում եմ՝ ընդհատակյա միջոցառումները, դավադրությունները հայրենասիրության հետ կապ չունեն»,- շեշտեց նա։
Մանրամասները՝տեսանյութում