Վանաձորի քաղաքապետ Մամիկոն Ասլանյանը ֆեյսբուքյան իր էջում ուղերձ է հղել համայնքի ավագանու նիստերը բոյկոտող խմբակցություններին՝ կոչ անելով նրանց մասնակցել ավագանու նիստերին և «մաս կազմել» քաղաքի կառավարմանը: Արտաքուստ Ասլանյանը նույնիսկ կառուցողական մոտեցում է դրսևորել, հանդուրժողականություն է ցուցաբերել: Ամբողջ խնդիրը, սակայն, Ասլանյանի կամ նրա թիկունքում գործող իշխանության ընտրած ժամանակն է, ամենակարևորը` իշխանություն կոչվածի պատկերացումը համաձայնության մասին: Վանաձորի խնդիրն իրականում շատ կարևոր է, որովհետև այն երկրի կառավարման մոդելի հիմքում դրված հակասահմանադրական ականներից մեկն է:
Մամիկոն Ասլանյանը, նրա թիկունքում կանգնած Վահրամ Բաղդասարյանը, Վանաձորի ինքնակոչի հետ ինքնամոռաց հրճվանքով լուսանկարված Կարեն Կարապետյանը ռացիոնալ համաձայնության մասին պետք է մտածեին մինչև Սահմանադրական դատարանի որոշումը: Հիմա ոչ թե համաձայնությունների, այլ լուծումների ժամանակն է, որովհետև դատարանի որոշումն իմպերատիվ է ու ենթադրում է ոչ թե քննարկումներ, այլ` կատարում:
Հիմա իշխանությունները դիմում են էժանագին «շուստրիության», ընդդիմությանն առաջարկում են կոնսենսուսի գեղեցիկ փաթեթավորմամբ քաղաքակիրթ տեսք տալ մանդատագողության վրա կայացած Վանաձորի Հանրապետական իշխանությանը: Կամ էլ` իսկապես ճիշտ են մամուլի հրապարակումները, որ իշխանություններին հաջողվել է «լեզու գտնել» Արթուր Բաղդասարյանի ՀՎԿ-ի հետ, և Մամիկոն Ասլանյանը դրա համար քարոզչական ֆոն է ստեղծում: Սակայն նույնիսկ այդ փաստը չի կարող լեգիտիմացնել Վանաձորի քաղաքապետին ու ավագանուն, որոնք մեկ տարուց ավելի գործել են հակասահմանադրական ռեժիմում:
Տեսականորեն ՀՀԿ-ն կարող է համաձայնության գալ ընդդիմության հետ, եթե Վահրամ Բաղդասարյանը խոստովանի, որ «շուստրիության» ռեսուրսը սպառված է, և Մամիկոն Ասլանյանը հրաժարական տա` ընդդիմությանը հնարավորություն տալով վերադառնալ ավագանի: Սա է Սահմանադրական դատարանի որոշումից բխող քաղաքական միակ կոմպրոմիսը: Եթե ոչ, ապա Վանաձորը սահմանադրական ռեժիմ կարող է վերադառնալ միայն նոր ընտրությունների դեպքում:
Սակայն, ըստ ամենայնի, ՀՀԿ-ն գնում է սեփական իշխանությունը պահպանելու ճանապարհով` զիջման չգալով անգամ մեկ քաղաքում, չհարգելով նույնիսկ ՍԴ որոշումը: Վանաձորի հակասահմանադրական նախադեպը արժեզրկում է խորհրդարանական կառավարման մոդելը, Սերժ Սարգսյանի պերճախոս ելույթները, վանաձորցիներին ուղղված Կարեն Կարապետյանի կեղծավոր ժպիտը: