«Եթե մի մասնաշենքում պատիժ են կրում և իրավապահ համակարգի նախկին աշխատակիցներ, և սովորական քրեական գործերով դատապարտված անձինք, և ցմահ դատապարտյալներ, պրոբլեմատիկ դատապարտյալներ, և եթե նրանք գողական են, ուրեմն՝ ես էլ կասմանավտ եմ»,- «Առաջին լրատվական»-ի հետ զրույցում ասաց «Արմավիր» ՔԿՀ-ի պետ Տիգրան Նավասարդյանը՝ արձագանքելով մամուլի այն հրապարակումներին, թե «Արմավիր» ՔԿՀ ղեկավարությունը որոշել է գողականների համար հատուկ շենք հատկացնել, մասնավորապես, 6-րդ մասնաշենքը տրվել է գողականներին, իսկ 6-րդ մասնաշենքի դատապարտյալներին տեղափոխել են խիստ ռեժիմային կորպուս:
«Ես առհասարակ ուզում եմ հասկանալ, թե ով է գողականը, ով է արտոնյալը»,- հավելեց Նավասարդյանը։
ՔԿՀ պետը նշեց, որ դատապարտյալների տեղափոխություն ՔԿՀ-ում մշտապես կատարվում է։ Ռեժիմներ են փոխվում, կալանավորը դառնում է դատապարտյալ, իսկ այդ պարագայում տեղափոխությունները նորմալ երևույթ են։ «Մանկապարտեզում, երբ երեխաները ճաշն ուտում են, գնում են իրենց սենյակները, քնում են, կամ երեխաներին մի խմբից մեկ այլ խումբ են տեղափոխում, եթե դա տեղաշարժ եք համարում՝ ես ինչ ասեմ։ Նույնն էլ այս դեպքում է, եթե մարդու ռեժիմը փոխվել է, կամ նա կալանավորից դարձել է դատապարտյալ և տեղափոխվել է համապատասխան խուց, և դա տեղաշարժ եք համարում, ապա, այո, տեղաշարժ եղել է։ Սա կենդանի աշխատող օրգանիզմ է։ Կալանավորը առավոտյան գնում է դատարան, դատարանում վճիռ է լինում, և նա արդեն երեկոյան տեղափոխվում է այլ խուց։ Սա ամենօրյա պրոցես է։ Ոչ մի արտառոց բան տեղի չի ունեցել»,-ընդգծեց Նավասարդյանը։
ՔԿՀ պետը բացառեց, որ «Արմավիր» ՔԿՀ-ում արտոնյալ պայմաններում գտնվող դատապարտյալներ կան։ «Այո, բացառում եմ»,- ասաց Նավասարդյանը՝ մեզնից հետաքրքրվելով, թե ինչ է նշանակում արտոնյալ պայման։
Մեր դիտարկմանը, թե արտոնյալ են այն դատապարտյալները, որոնց նկատմամբ ՔԿՀ ղեկավարությունը խիստ վերաբերմունք ցույց չի տալիս, նրանք ազատորեն կարողանում են օգտվել արգելված իրերից՝ բջջային հեռախոսից, համացանցից, կարողանում են ազատորեն ՔԿՀ բերել և դուրս հանել իրենց ցանկացած իր, ապրանք, Նավասարդյանը արձագանքեց. «Արգելված իր բոլորն էլ ուզում են ունենալ։ Իրենց գործը արգելված իր ունենալն է, իմ գործն էլ՝ արգելելն ու հանելը։ Եթե գաք ու տեսնեք, թե ինչքան արգելված իր ենք հայտնաբերում, ինչպես ենք պատժում։ Եվ եթե մեկը կասի, որ իր մոտից արգելված իր են հանել և չեն պատժել, կամ գիտեն՝ դա ոնց է մտել ՔԿՀ ու չեն բռնել, ես ձեռքերս վեր կբարձրացնեմ։ Դուք միայն տեսեք, թե քանի քրեակատարողականի ծառայող ենք պատժել, քանի քրեական հետապնդում է իրականացվում, պարզ կդառնա ձեզ իրականությունը»։