Իրաքի դաշնային դատարանը բացառել է երկրի կազմից Իրաքյան Քրդստանի դուրս գալը՝ անկախության հարցով հանրաքվեի անցկացումից հետո, հայտնում է «Ալ-Սումարիան»։ Դատարանը հաստատել է, որ հանրապետության հիմնական օրենքում չկա հոդված, որը թույլ կտա որևէ տարածաշրջանի առանձնացում։
Սեպտեմբերի 25-ին կայացած հանրաքվեի արդյունքներով Իրաքից անկախանալու օգտին քվեարկել էր ընտրողների 93 տոկոսից ավելին։ Հոկտեմբերի վերջին Իրաքյան Քրդստանի կառավարությունը հանդես էր եկել հայտարարությամբ, որում պատրաստակամություն էր հայտնել սկսելու կենտրոնական կառավարության հետ «բաց երկխոսություն»՝ սառեցնելով հանրաքվեի արդյունքները։