Վլադիմիր Պուտինը նախագահության սկզբնական շրջանում աջակցել է շուկայական տնտեսությամբ ժողովրդավար պետության ստեղծման բարեփոխումներին, սակայն Բեսլանի ողբերգությունից հետո Պուտինը սկսել է դրսևորվել այնպիսին, ինչպիսին կա իրականում՝ նախկին Պետանվտանգության կոմիտեի խորհրդային աշխատողի մտածելակերպով։ Այս մասին «112 Ուկրաինա» հեռուստաալիքի «Գորդոն» ծրագրի հետ հարցազրույցում ասել է ՌԴ նախկին վարչապետ Միխայիլ Կասյանովը։
«Նա միշտ կարծել է, որ ԽՍՀՄ նախկին հանրապետությունները լիարժեք նոր պետություններ չեն, և նրանց հետ հարաբերությունները նա երբեք չի կառուցել և չի կառուցի որպես հավասար գործընկերների հետ։ Ես նրա հետ տարաձայնություններ ունեի, այդ թվում Ուկրաինայի հարցով, քանի որ ես Ուկրաինայի հանդեպ կառավարության քաղաքականությունը վարում էի, ինչպես հավասար գործընկերների։ Մենք պայմանավորվել էինք, ստորագրել հավասար պայմաններով համաձայնագիր, որպեսզի լինի փոխադարձ շահ։ Պուտինին դա այդքան էլ դուր չէր եկել։ Նրան դուր չէր եկել, որ ես ինչ-որ հարցերով զիջումների էի գնացել՝ հանուն ինչ-որ համաձայնագրերի ձեռքբերման։ Նա կարծել է, որ Ուկրաինան և մյուս պետությունները «ենթապետություններ» են։ Կարծում եմ՝ նա այսօր էլ ապրում է այդ տեսակետով»,-ասել է Կասյանովը։
