Տնտեսական աճի տեմպերը պետք է գերազանցեն սոցիալական ծրագրերի տեմպերին, այլապես՝ սոցիալական ոլորտում օրենքները կընդունվեն, բայց կյանքի չեն կոչվի: Այդ մասին «Առաջին լրատվական»-ի հետ զրույցում ասաց Հայաստանի գործատուների հանրապետական միության նախագահ Գագիկ Մակարյանը: Ըստ նրա՝ մի շարք գործոններ հանգեցնում են նրան, որ բնակչությունը կորցնում է աշխատունակությունը, գնողունակությունը: Անդրադառնալով գնաճին, Գագիկ Մակարյանն ասաց, որ պատճառներից մեկն այն է, որ Եվրոպայում որոշ ապրանքների գները թանկացել են իսկապես, բայց սուպերմարկետների հաղորդած հիմնական պատճառներից մեկն այն է, որ եվրոն թանկացել է: Ըստ նրա՝ կան նաև գնաճի սպեկուլյատիվ պատճառներ:
«Կարագի այլ տեսակներ կան, որ Ռուսաստանից են բերվում, այնտեղ գինը չի փոխվել: Այստեղ էական աշխատանքներ ունի կատարելու ՏՄՊՊՀ-ն, որը հաճախ ուշացած է հանդես գալիս, երբ որ տենդենցները զգում է, պիտի փորձի հասկանա պատճառները, ուսումնասիրություն կատարի, լուրջ հիմնավորումներ բերի դրա համար և աշխատի համապատասխան ներկրողների հետ: Մեկ ամիս հետո Նոր տարվա գնումներ են սկսվելու, 2018-ից ԵԱՏՄ-ի օրենսդրությամբ պայմանավորված որոշ ապրանքներ են թանկանալու, քանի որ տուրքերն են ավելանալու: Այսինքն՝ հիմիկվանից թանկացման ռեժիմներով ենք շարժվելու, բայց աղքատությունը, գործազրկությունը չի կրճատվել, հետևաբար, ցածր գնողունակությամբ ժողովուրդ ունեցող երկրում սա կարող է սոցիալական խորացնող երևույթներ առաջացնել, ճգնաժամ: Առաջին հերթին աղքատների թիվը կավելանա, ավելի շատ հիվանդությունների, թերսնման խնդիրը կսրվի, կարող է մահացության դեպքերն ավելանան»,- շեշտեց նա:
Գագիկ Մակարյանի դիտարկմամբ՝ ժողովուրդը, մարդն ամենաթանկ արժեքն է, եթե դա կորցնում ենք, ապա պետության շապիկը մնում է սոցիալական, բայց ծրագրերը լիարժեքորեն չեն իրականացվում:
Մանրամասները՝ տեսանյութում: