Այսօր կառավարության նիստից հետո, խոսելով «Մաքուր Հայաստան» ծրագրի մասին, տարածքային կառավարման և զարգացման նախարար Դավիթ Լոքյանն ափսոսանք հայտնեց, որ նախկինում չի ձևավորել այն մշակույթը, որ մեզանից յուրաքանչյուրը հասկանա, որ մեքենայից դատարկ շիշ չի կարելի նետել, և Սևան-Երևան մայրուղու կամ Ապարան գնացող ճանապարհին որևէ գնում անելուց հետո չի կարելի այդ տոպրակը նետել:
«Յուրաքանչյուր շաբաթ մաքրում ենք այդ տարածքները, բայց նորից աղբի կուտակումներ են հայտնվում: Սա գալիս է նրանից, որ մենք դաստիարակության նորմեր չենք ձևավորել դպրոցից, ընտանիքից, իհարկե բոլորին սա չի վերաբերում: Մեր թիվ մեկ խնդիրը դա է դառնալու, թե ինչպես մտցնել այս մշակույթը, որ բնությունը պահեն, ոչ թե աղտոտեն»,-ասաց նա:
Ինչ վերաբերում է դիտարկմանը, որ գուցե աղբամաններն են քիչ, նա ասաց, որ դա արդարացում չէ: Նա նշեց, որ հաջորդ տարի մոտ 10 հազար աղբաման է գնվելու, քարոզչություն է տարվելու, հոլովակներ են պատրաստվելու, գլխարկներ, բաժակներ են պատրաստվելու։
Դավիթ Լոքյանի խոսքով՝ աղբը թափելու համար տուգանք սահմանելու վերաբերյալ օրենք են փոխանցել ՀՀ արդարադատության նախարարություն։
«Այն բավականին կոշտ վարչական պատիժներ է սահմանում մեքենայից աղբ, ծխախոտի մնացորդ նետելու համար, նվազագույն տուգանքի չափը 16 հազար դրամ է, խոշոր ձեռնարկությունների համար՝ 200-300 հազար դրամ»,-ասաց Լոքյանը։
