«Առաջին լրատվական»-ի զրուցակիցն է ԱԺ «Ծառուկյան» դաշինք խմբակցության պատգամավոր, ՀՀՇ վարչության անդամ Արարատ Զուրաբյանը:
-Պարոն Զուրաբյան, Հայաստանում Եվրամիության դեսպան Պյոտր Սվիտալսկին անդրադարձել է իր վերջին հայտարարությունից հետո իշխանության արձագանքին: Դեսպանը նաև ասել է, որ հայերը շատ լավ հասկանում են, որ ինքնիշխանության սպառնալիքներն այլ տեղ են թաքնված: Նա շեշտել է, որ դա արել են ՀՀ իշխանությունների բաց խնդրանքի հիման վրա։ Եվ եթե այլևս իշխանությունները չեն ուզում, իրենք չեն անի: Իշխանությունն արձագանքում է, որ իր դիրքորոշումն անփոփոխ է: Ի՞նչ վտանգներ եք տեսնում, արդյո՞ք սա չի խոչընդոտի Հայաստան-ԵՄ փաստաթղթի ստորագրմանը։
-Ոչ, կարծում եմ՝ սա փաստաթղթի հետ կապված ոչ մի բան չի կարող փոխել: Ինչևէ, կարծում եմ, որ հայաստանյան իշխանությունների տեսակետները շատ բուռն էին: Եվ ես չեմ կարծում, որ Սվիտալսկին միջամտում էր Հայաստանի ներքին գործերին: Մարդը ներկայացնում է կառույց, որը որոշակի դերակատարում է ունեցել ընտրությունների կազմակերպման մեջ, ինչ-որ հարթակում արտահայտել է տեսակետ, որտեղ որևէ վիրավորական բան չի արտահայտվել Հայաստանի կամ մեծամասնություն ստացած քաղաքական ուժի նկատմամբ: Ցանկացած ընտրության պարագայում անհրաժեշտ է մարդկային վստահություն, որը, ցավոք սրտի, պակասում է Հայաստանում: Եվ մենք բոլորս Հայաստանում դրա մասին տեղեկացված ենք: Ինչևէ, կարծում եմ, որ արտառոց ոչ մի բան տեղի չի ունեցել և չեմ կարծում, որ սա թեմա է, որ կարող է ինչ-որ բանի վրա ազդեցություն ունենալ:
-Շատ հստակ գնահատականներ կային դեսպանի խոսքում ԿԸՀ կազմի փոփոխության անհրաժեշտության հետ կապված: Իշխանությունն այս օրերին ամեն կերպ պաշտպանում է ԿԸՀ-ին: Ինչո՞ւ:
-Ես այսպես չէի որակի այս ամենը: Գտնում եմ, որ առաջարկը եղել է այնպես, որ ԿԸՀ-ն պետք է ավելի ընդգրկուն լինի: Կարծում եմ՝ շատ նորմալ է, և այստեղ որևէ արտառոց բացասական բան չկա, ինչպես նաև դատական իշխանությունների հետ կապված, որ հավատը, վստահությունը բարձրանա, սա նույնպես նորմալ է, և որևէ ողջամիտ մարդ որևէ առարկություն սրան չի կարող ունենալ: Ես այլ բան եմ այստեղ տեսնում, տեսնում եմ հայկական կողմի մտահոգությունը հետևյալում. մարդիկ կարծում են, որ շատ լավ ընտրություններ են անցկացրել, հետընտրական պրոցեսների բացակայությունը իրենց համար դրա վառ վկայությունն է: Ես կասեի մեկ այլ բան. Հայաստանում տեղի են ունեցել հերթական ընտրությունները, որտեղ իշխանությունը շատ ավելի կազմակերպված բնույթի գործողություններ իրականացնելու արդյունքում կարողացել է ստանալ հաստատուն մեծամասնություն, և քանի որ այս ընթացքում չեն եղել ինչ-որ արտառոց բռնություններ, կեղծումներ և այլն, համոզված է, որ լուրջ փոփոխություններ է կատարվել և որևէ արտահայտություն սրա դեմ, կամ սա ինչ-որ տեղ ստվերող, համարում է բացասական: Ես կարծում եմ՝ արտառոց որևէ բան չի կատարվել և նաև ԵՄ կամ եվրոպական այլ կառույցների վրա որևէ նմանատիպ հարցի վերաբերյալ հայկական կողմի տեսակետների արտահայտումը որևէ ազդեցություն չի կարող ունենալ:
-Պարոն Զուրաբյան, փորձագետները նշում են, մենք 2013-ին, մեկ գիշերում տեսանք սահուն անցում ԵՏՄ-ի, հիմա իշխանության ձեռքին հնարավոր ալիբի կարող է լինել, եթե հանկարծ փաստաթուղթը կյանքի չկոչվի: Համամի՞տ չեք:
-Կարծում եմ՝ Հայաստանում ամեն ինչ հնարավոր է, հնարավոր է՝ ստորագրվի, հնարավոր է՝ չստորագրվի: Մենք դրա նախադեպերը ունենք: Ինչևէ, հույս ունեմ, որ բանականությունը և ողջամտությունը կհաղթանակի, և Հայաստանը գոնե այս ձևաչափով և այս բովանդակությամբ կստորագրի այս փաստաթուղթը, որովհետև դա կարևոր է մեր ապագայի համար, սա խոսում է նրա մասին, որ մենք ունենալու ենք քաղաքակիրթ երկիր դառնալու հնարավորություն, հակառակը մեզ տանելու է դեպի այն հույսի խումբ երկրների շարք, որը ընդհանրապես ողջունելի չէ:
-Նկատի ունեք ԵՏՄ երկրների՞ն:
-Ոչ միայն ԵՏՄ երկրներին: Այդ միության երկրների մի մասը, կարծում եմ, որ կփոփոխվի որպես քաղաքականություն իրականացնող և հասարակություններին ծառայող պետություններ: Փոփոխություններ ես տեսնում եմ, օրինակ, Ղազախստանում, կարծում եմ՝ կլինեն Հայաստանում, մի մասում ավելի շուտ կլինեն, մի մասում ավելի ուշ, բայց ես կարծում եմ՝ եթե մենք հրաժարվենք նախաստորագրումից հետո նման տիպի մեծ փաթեթը ստորագրելուց, ուրեմն մենք ճամապարհ ենք բռնել դեպի Հյուսիսային Կորեա: Ես երբեք չեմ ցանկանա, որ այդպես լինի:
Լուսանկարը՝ azatutyun.am-ի