«Ելք» դաշինքի պատգամավոր Գեւորգ Գորգիսյանը մի քանի հարց ուղղեց Պաշտպանության, ազգային անվտանգության եւ ներքին գործերի մշտական հանձնաժողովի նախագահի թեկնածու Կորյուն Նահապետյանին. «Ապրիլյան պատերազմը ցույց տվեց, որ մեր բանակում կան որոշակի խնդիրներ, ի՞նչ քայլեր եք ձեռնարկելու՝ վերահսկողությունն ավելի ուժեղացնելու համար եւ մինչ պատերազմական իրավիճակը հնարավոր խնդիրների բացահայտման եւ շտկման ուղղությամբ: Մյուս հարցս վերաբերում է ՀՀ ոստիկանությանը: Վերջին տարիներին մենք ունեցանք դեպքեր, երբ խաղաղ ցուցարարների նկատմամբ կիրառվեց անհամաչափ ուժ եւ գործնականում ոչ մի ոստիկան չպատժվեց: Ի՞նչ մեխանիզմներ եք պատրաստվում սրա համար կիրառել: Նաեւ՝ ազգ-բանակ կոնցեպտի ենթատեքստում՝ ինչպե՞ս եք վերաբերվում պահուստային բանակի գաղափարին»:
Կորյուն Նահապետյանը պատասխանեց, որ բանակում առկա խնդիրների մասին իրենք միշտ խոսել, բարձրաձայնել են, սակայն, որպես կանոն, փակ ձեւաչափերով. «Ինչ վերաբերում է ոստիկանության ոլորտում առկա խնդիրներին, ապա կարող են հնչել որոշ գնահատականներ ոստիկանության գործողությունների վերաբերյալ, թե որքանով են դրանք իրավաչափ, համաչափ: Դրա համար կան իրավական գնահատականներ: Ոստիկանապետի կողմից նշանակվել են համապատասխան ծառայողական քննություններ: Ոստիկանության առանձին աշխատակիցներ ենթարկվել են կարգապահական պատասխանատվության, առանձին դեպքերում՝ նաեւ քրեական գործեր կան»:
Գորգիսյանն արձագանքեց, նշելով, որ միգուցե ոստիկանության կողմից պատիժներ եղել են, սակայն դրանք հրապարակային պարսավանքի միջոց չեղան. «Ես չգիտեմ մի դեպք, որ կոնկրետ մի ոստիկան պատժվել է»:
Մանրամասները՝ տեսանյութում: