Երեկ ԼՂ խնդրի կարգավորման գործընթացում, ավելի ճիշտ՝ հայ-ադրբեջանական վերջին օրերի լարվածության միջազգային արձագանքի հարցում շրջադարձային կարևոր իրադարձություններ են տեղի ունեցել:
Նախ՝ ՌԴ ԱԳՆ խոսնակ Մարիա Զախարովան, ապա և ԵԱՀԿ Մինսկի խմբի համանախագահներն արձանագրել են, որ Լեռնային Ղարաբաղի և Ադրբեջանի զինված ուժերի շփման գծում վերջին օրերին լարվածության աճը սկսվել է ադրբեջանական կողմից հրադադարը խախտելու հետևանքով: Նույնիսկ ապրիլյան պատերազմի օրերին չի հիշվում դեպք, երբ միջնորդները հանդես գան նման հասցեական գնահատականով, որն, ըստ էության, Ադրբեջանին հասցեագրված մեղադրանք է: Առնվազն մնում է ենթադրել, թե ինչ գործոններ են ազդել, որպեսզի համանախագահները հրաժարվեն իրենց չեզոք, հաճախ անատամ գնահատականներից:
Սա, անշուշտ, դիվանագիտական ճնշում է Ադրբեջանի վրա՝ վերջինիս Վիեննայի համաձայնություններին մղելու նպատակով: Բաքվին բաց տեքստով հասկացվում է, որ եռանախագահությունը հետայսու հանդես է գալու հասցեական գնահատականներով, եթե նույնիսկ Ադրբեջանը համառի միջադեպերի հետաքննության մեխանիզմների ներդրման պայմանավորվածությունը կատարելու հարցում:
Մյուս կողմից՝ վերջին օրերի ադրբեջանական սադրանքները լոկալ բնույթի չեն և, ըստ էության, նպատակադրված նախապատրաստում են նոր պատերազմի սանձազերծում, որն իր ծավալով ու հետևանքներով ավելի ընդգրկուն և մահաբեր է լինելու հակամարտող կողմերի և տարածաշրջանի համար: Նման ահազանգեր արդեն հնչեցվել են Վաշինգտոնի ու Մոսկվայի փորձագիտական շրջանակներում: ԵԱՀԿ Մինսկի խմբի համանախագահությունը միջազգային իրավաքաղաքական ձևակերպում է տալիս այդ մտահոգություններին՝ փորձելով Ադրբեջանին հետ պահել հնարավոր արկածախնդրությունից: Եվ վերջապես՝ խիստ կարևոր է, որ Ադրբեջանին հասցեագրված հայտարարության հեղինակը ոչ թե միջնորդներից մեկն է, այլ բոլոր երեքը՝ ԵԱՀԿ Մինսկի խմբի համանախագահության դեմքով:
Սա միջազգային հանրության հստակ մեսիջն է, որ չի լեգիտիմացվելու Ադրբեջանի, այսպես ասած, պատերազմ սանձազերծելու և գործընթացի խաղի կանոնները խախտելու քաղաքականությունը: Մանավանդ, որ հունիսին ծրագրված է համանախագահների տարածաշրջանային հերթական այցը: