ՀԱՊԿ գլխավոր քարտուղար է նշանակվել Հայաստանի ազգային անվտանգության խորհրդի քարտուղար Յուրի Խաչատուրովը, ՀԱՊԿ գլխավոր քարտուղարի պաշտոնը նա կստանձնի 2017թ. մայիսի 2-ից:
Քաղաքագետ Ալեքսանդր Իսկանդարյանը դրական է գնահատում ՀԱՊԿ գլխավոր քարտուղարի պաշտոնում Հայաստանի ներկայացուցիչ Յուրի Խաչատուրովի նշանակումը, սակայն կարծում է, որ դրանով Հայաստանի համար իրավիճակ չի փոխվի:
«Իհարկե, դա վատ չէ, բայց իրավիճակը չի փոխվի: Ռուսաստանն ու Հայաստանը ՀԱՊԿ շրջանակում լուրջ համագործակցություն ունեն, որը պայմանավորված չէ այդ կառույցը գլխավորող անձերով»,- ապրիլի 18-ին լրագրողների հետ հանդիպմանն այս մասին ընդգծել է քաղաքագետը:
Նա հավելել է, որ կգա ժամանակ, երբ ՀԱՊԿ գլխավոր քարտուղարի պաշտոնում կնշանակվեն կազմակերպության անդամ այլ երկրների ներկայացուցիչներ, սակայն դա չի նշանակում, որ տվյալ երկրների համար վիճակը կփոխվի:
Անդրադառնալով Հայաստանի ներկայացուցչին ՀԱՊԿ գլխավոր քարտուղարի պաշտոնում նշանակելը ձգձգելուն` քաղաքագետը վստահեցրել է, որ դա Հայաստանի հետ որևէ կապ չուներ: «Դա կապված էր Բելառուս-Ռուսաստան հարաբերությունների հետ: Բելառուսը կամ նախագահ Լուկաշենկոն ամեն հարթակ օգտագործում են իրենց քաղաքական նպատակներին հասնելու համար: Վաղ թե ուշ այդ երկրները գալիս են ինչ-որ համաձայնության: Դա տեղի ունեցավ նաև այս դեպքում»,- մանրամասնել է քաղաքագետը: