ԱՄՆ Պետդեպարտամենտը երեքշաբթի նախազգուշացում է հրապարակել ԱՄՆ քաղաքացիների համար՝ կապված ահաբեկչական սպառնալիքի աճի հետ Թուրքիա ուղևորություններ կատարելու վտանգի վերաբերյալ։ Այս մասին հայտնում է TASS գործակալությունը՝ հղում անելով գերատեսչության տարածած հայտարարությանը։
«ԱՄՆ քաղաքացիները նախազգուշացված են աճող սպառնալիքների մասին, որոնք գալիս են Թուրքիայում ահաբեկչական խմբավորումներից։ Պետք է մտածել ստեղծված պայմաններում Թուրքիա ուղևորությունների անհրաժեշտության մասին, բացի այդ, խուսափե՛ք Թուրքիայի հարավ-արևելք ուղևորություններից՝ կապված պահպանվող ահաբեկչական սպառնալիքի հետ»,-ասվում է հայտարարությունում։
Դրանում նաև ընդգծվում է, որ ԱՄՆ իշխանությունների բոլոր ներկայացուցիչներին և նրանց ընտանիքի անդամներին, ովքեր ապրում են Ստամբուլում կամ այցելում այդ քաղաք, արգելված է ճանապարհորդել մեծ խմբերով, ինչպես նաև այցելել մարդկանց կուտակումների վայրեր և հայտնի տեսարժան վայրեր։
«Մարտի սկզբին և ապրիլին Թուրքիայում սպասվում են բազմաթիվ ելույթներ ու հանրահավաքներ, որոնցից շատերը՝ քաղաքական բնույթի։ Թուրքիայում ամերիկյան դիվանագիտական առաքելությունը խորհուրդ է տալիս ԱՄՆ քաղաքացիներին խուսափել ցույցերի ու հանրահավաքների անցկացման վայրերից՝ անկախ դրանց բնույթից՝ կապված այդ միջոցառումների ժամանակ բռնության պոտենցիալ դրսևորումների հետ»,-նշվում է մամլո հաղորդագրությունում։