«2017թ. միջազգային համագործակցության առումով բավականին արդյունավետ սկսեցինք և 2016թ. ձեռք բերված պայմանվորվածությունները սկսեցինք կենսագործել: Մենք ակտիվորեն աշխատում ենք Սփյուռքի մեր կառույցների հետ: Եվրոպա և ԱՄՆ կատարած մեր այցերը պայմանավորված էին Սփյուռքի հետ մեր համագործակությամբ»,- «Առաջին լրատվական»- ի հետ զրույցում այս մասին ասաց Արցախի ՄԻՊ Ռուբեն Մելիքյանը՝ հավելելով, որ Սփյուռք ասելով՝ նկատի ունի ամբողջական երևույթ՝ իր բոլոր ինստիտուտներով:
Ռուբեն Մելիքյանի խոսքով՝ Եվրոպա կատարած այցի ժամանակ հանդիպումներ են եղել 4 քաղաքներում՝ այդ թվում նաև Ստրասբուրգում, Բրյուսելում, Վիեննայում:
Արցախի ՄԻՊ-ը նշեց, որ քաղաքական գործիչ չէ և քաղաքական գործունեություն չի իրականացնում, այլ իր գործունեությամբ նպաստում է երկու գործընթացի՝ ճանաչելիություն և ներգրավում, և ընդգծեց, որ առաջին հերթին իրավապաշտպան համայանքի ներգրավման կարիք կա:
Նրա խոսքով՝ աշխարհին պետք է ճիշտ ներկայացնել Արցախի խնդիրները: «Հաճախ Արցախը ընկալվում է որպես Սպարտա: Արցախը միայն Սպարտա չէ, այնտեղ կա բավականին ակտիվ քաղաքացիական հասարակություն, կան բազմաթիվ խնդիրներ… Հայության շրջանակներում էլ խնդիր ունենք ներկայացնելու, որ Արցախը միայն զինվորական համազգեստով մարդիկ չեն, որոնք սահման են պաշտպանում, Արցախը կենդանի օրգանիզմ է»:
Մանրամասները՝ տեսանյութում: