Լուրեր
Նախարարի հայտարարությունը խեղկատակություն էր. ակտիվիստ
  • 17:26
  • 2017-03-20
  • Դիտումներ՝ *

Արթուր Սարգսյանի մահվան օրվանից սկսած՝ ի հիշատակ և ի սատարումն «Հաց բերող»-ի ՝ շուրջօրյա հավաքներ, նաև երթեր, նստացույցեր են իրականացվում ՝ մի քանի պահանջով։

Սկզբում ցուցարարները պահանջում էին Արթուր Սարգսյանին հուղարկավորել Եռաբլուր պանթեոնում: Այժմ նրանք պահանջում են գլխավոր դատախազի հրաժարականը և քրեական գործ հարուցել դատախազի նկատմամբ, ով միջնորդել է կալանավորել Արթուր Սարգսյանին, և այն դատավորի նկատմամբ, ով հաստատել է միջնորդությունը։ Երրորդ պահանջը՝ արդարադատության նախարարի հրաժարականն էր, որից ցուցարարները հրաժարվել են:

«Առաջին լրատվական»- ի հետ զրույցում քաղաքացիական ակտիվիստ Մաքսիմ Սարգսյանն անդրադարձավ ՀՀ պաշտպանության նախարար Վիգեն Սարգսյանի հայտարարությանը՝ «Հաց բերող» Արթուր Սարգսյանին Եռաբլուր պանթեոնում հուղարկավորելու պահանջի վերաբերյալ: «Եռաբլուրը զինվորական պանթեոն է, այնտեղ հանգչում են մարդիկ, ովքեր զոհվել են մարտական գործողությունների ժամանակ կամ ունեցել են բացառիկ ներդրում բանակաշինության գործում։ Այնտեղ չկան այլ հուղարկավորվածներ։ Որպես պաշտպանության նախարար՝ համարում եմ, որ չի կարելի «Եռաբլուրը» խառնել որևէ այլ թեմայի հետ, անկախ նրանից, թե ինչ հանգամանքեր կան։ Հատկապես երբ կա հարցի քաղաքական բնույթ՝ «Եռաբլուրը» չպետք է քաղաքականացվի»,- հայտարարել էր նախարարը:

Մ. Սարգսյանի գնահատմամբ՝ նախարարի խոսքն անիմաստ է: «Բոլորս էլ գիտենք, որ Արթուրն Արցախյան պատերազմի մասնակցից է, այնտեղ լուրջ վնասվածք է ստացել… Արթուրին Եռաբլուրում հուղարկավորելու պահանջը օրինաչափ էր և իրավաչափ: Ի՞նչ է, պատերազմին մասնակից մարդը զինվորական չէ՞: Նախարարի հայտարարությունը անլուրջ քայլ է, խեղկատակություն»,- նշեց ակտիվիստը:

Քաղաքացիական ակտիվիստի հավաստմամբ՝ Արթուր Սարգսյանին Եռաբլուրում հուղարկավորելու պահանջից հրաժարվելու պատճառն այն էր, որ նրա ընտանիքը համաձայնել է կամ նպատակահարմար է գտել նրան Շահումյանում հուղարկավորել: «Մենք չէինք կարող չհարգել հարազատների որոշումը»,- նշեց ակտիվիստը և հավելեց, որ կարևորը Արթուրի գործը շարունակելն է, Արթուր տեսակը պահպանելն ու նրա գաղափարները տարածելը:

Մանրամասները՝ տեսանյութում:

  • Դիտումներ՝ *