Հայաստանն առաջընթաց է գրանցել մարդկանց շահագործման դեմ պայքարում: Այս մասին ասվում է Եվրոպայի Խորհրդի Մարդկանց շահագործման (թրաֆիքինգի) դեմ պայքարի փորձագիտական խմբի (GRETA) զեկույցում, որը հրապարակվել է մարտի 20-ին: Զեկույցում միևնույն ժամնակ նշվում է, որ շատ բան պետք է արվի երեխաների թրաֆիքինգը, աշխատանքային նպատակով մարդկանց շահագործումները կանխելու, ինչպես նաև զոհերին պաշտպանելու և աջակցելու համար:
GRETA-ի նոր զեկույցը ընդգրկում է 2012 թվականից մինչև 2016թ. դեկտեմբերն ընկած ժամանակահատվածը: Հայաստանը նախկինի պես շարունակում է մնալ մարդկանց թրաֆիքինգի ծագման երկիր: Այս ընթացքում հայտնաբերվել է թրաֆիքինգի շուրջ 70 զոհ, որոնց մեծ մասը կանայք են (32) , 30-ը՝ տղամարդիկ, 17-ը՝ երեխաներ: Զոհերի մեծամասնությունը Հայաստանի քաղաքացիներ են. նրանք աշխատանքային շահագործման են ենթարկվել արտասահմանում, հիմնականում Արաբական Միացյալ Էմիրություններում, Թուրքիայում, Ռուսաստանում: 2014թ. բացահայտվել է դեպք, երբ Չինաստանի 4 քաղաքացիներ առևտրի առարկա են դարձել Հայաստանում
Փորձագիտական խումբը միևնույն ժամանակ Հայաստանի իշխանություններին կոչ է անում առավել արդյունավետ կանխել մարդկանց առևտուրը, այդ թվում՝ աշխատանքի ընդունման գործակալությունների հանդեպ մոնիթորինգը բարելավելու, լիցենզային ընթացակարգեր սահմանելու, համացանցում աշխատանքի կեղծ հայտարարությունները կանխելու միջոցով: Իշխանությունները պետք է բարելավեն նաև խոցելի իրավիճակներում հայտնված երեխաներին ցուցաբերվող աջակցությունը: Առանձնահատուկ ուշադրություն պետք է դարձնել գյուղական վայրերում երեխաների աշխատուժի շահագործման դեպքերին, հատուկ հաստատություններում գտնվող երեխաներին, ինչպես նաև եզդի աղջիկներին, որոնց սպառնում է սեռական ոտնձգությունների և թրաֆիքինգի վտանգ՝ վաղ տարիքում ամուսնության պատճառով:
GRETA-ն ՀՀ իշխանություններին նաև կոչ է անում ապահովել, որպեսզի Հայաստանում իրավաբանական անձինք պատասխանատվության ենթարկվեն՝ մարդկանց առևտրի հետ կապված հանցագործությունների համար: