«Ես կփորձեմ համագործակցել բոլոր այն ուժերի հետ, ովքեր կճանաչեն այս 25-ամյա ավտորիտար ռեժիմը, և՛ Լևոն Տեր-Պետրոսյանին, և՛ Ռոբերտ Քոչարյանին, և՛ Սերժ Սարգսյանին կճանաչեն որպես հանցագործների, և դրանից հետո կգնան այն ուղով, որի մասին նշել եմ, այսինքն՝ կստեղծեն ժամանակավոր մարմիններ, որոնք պետք է սպասարկեն ապագա ընտրությունների ընթացքը»: Այս մասին «Առաջին լրատվական»- ի հետ զրույցում ասաց ԱԺ պատգամավոր Զարուհի Փոստանջյանը՝ անդրադառնալով հարցին, թե նա ում հետ կարող է առաջիկայում համագործակցել:
Զ. Փոստանջանը հավաստիացրեց, որ շարունակելու է մնալ ակտիվ պայքարի մեջ, նա չի կարծում, թե մանդատն է, որ հնարավորություն պետք է ընձեռի զբաղվել քաղաքականությամբ. «Եթե ցանկություն ունես ակտիվ քաղաքական գործունեություն ծավալելու, դա կարող ես անել նույնիսկ առանց մանդատի, հետևաբար ամեն գնով խորհրդարան խցկվելը, չեմ կարծում, թե ճիշտ է և արդյունավետ կարող է լինել»:
Զարուհի Փոստանջյանի կարծիքով՝ դաշինքները, որոնք ընտրություններից առաջ ստեղծում են արհեստական հիմքերի վրա, արդյուանվետ չեն կարող լինել:
Անդրադառնալով դիտարկմանը, որ «Ժառանգություն»- ը պնդում է, թե դաշինք կազմելով՝ չի հեռացել իր սկզբունքներից, Զ. Փոստանջյանը հակադարձեց. «Եթե այդ մասին հայտարարում են, ապա պետք է հղում կատարեն իրենց կողմից ստորագրված փաստաթղթերին, որոնցից մեկը ստորագրվեց անցյալ տարվա դեկտեմբերի 28-ին: Այդ փաստաթուղթը վկայում է այն մասին, որ ովքեր այն ներկայացնում են, չեն կրում «Ժառանգության» սկզբունքներն ու գաղափարախոսությունը և ծրագիրը, որովհետև այդ փաստաթղթում նշվում է, որ «Ժառանգություն»- ը հող պահանջողից դարձել է հող հանձնող և «Սասնա ծռեր»-ին ճանաչում է որպես մեղադրյալներ…»:
Մանրամասները՝ տեսանյութում:
