«Առաջին լրատվական»-ի զրուցակիցն է ԱԺ ՀՀԿ խմբակցության ղեկավար Վահրամ Բաղդասարյանը:
– Պարոն Բաղդասարյան, ինչո՞ւ վարչապետ Կարեն Կարապետյանի հետ եկած նախարարները չկան ՀՀԿ ցուցակում՝ Իգնատ Առաքելյան, Վահան Մարտիրոսյան, Լևոն Ալթունյան։ Դա նշանակո՞ւմ է, որ ծրագրեր են փոխվել, և վարչապետին այնքան էլ երկար ժամանակ չի մնացել աշխատելու, թե՞…
– Եթե այդ մարդիկ էլ լինեին, ուրիշ մարդկանց անուններ պետք է գտնվեին: Մենք շատ մանրակրկիտ նայել ենք: Դուք գիտեք, որ նրանք նոր մարդիկ են, ավելի շատ գործարար աշխարհի մարդիկ են: Հատկապես համամասնական ցուցակում ընդգրկել ենք այնպիսի մարդկանց, որոնք, անկախ նրանից՝ գործադիր մարմնի անդամ են, պառլամենտի, թե հանրությանը որոշակի հայտնի մարդիկ են, լինեն ավելի շատ քաղաքականացված և հանրությանը հայտնի: Ես ավելի շատ կողմնակից եմ եղել դրան նաև նախկինում, որ մենք չծանրաբեռնենք բոլոր նախարարներով: Այդ մարդիկ մեր թիմն են, և որևէ մրցակցություն չի եղել, որ բոլորն ընդգրկվեն ցուցակում: Սա մեր ներքին պայմանավորվածության խնդիրն է, և շատ համերաշխ մեր թիմում այդ ցուցակը կազմվել է: Մենք մեկ ուրիշի ներքին խնդիրներին չենք խառնվում, թե իրենց ցուցակը ինչպես եղավ, որ այդպես կազմվեց, այդպիսի խայտաբղետ ցուցակներ, 4-5 կուսակցություններ փոխած մարդիկ կան այդ ցուցակներում ընդգրկված: Մենք մեր ցուցակը կազմել ենք շատ տրամաբանական, շատ մրցունակ, որի արդյունքը և պատասխանը կտա հանրությունը, և ամսի երկուսից հետո դրա մասին կխոսենք:
– Բայց ձեր ցուցակում են կան նախկին ԲՀԿ-ականներ…
– Մենք ԲՀԿ-ի հետ եղել ենք կոալիցիոն գործընկերներ, և այդ փոփոխությունները մեր մոտից՝ այնտեղ, նրանց մոտից՝ մեզ մոտ, այդքան վտանգավոր չեն: Գաղափարական սուր փոփոխությունների ենթարկված մարդիկ բավականին շատ են քաղաքական դաշտում. երբ տարիներ շարունակ ունեցել են մի գաղափարական գիծ և անմիջապես, 180 աստիճան շուռ տալով՝ ունենում են մի ուրիշ գիծ: Այդպես չի լինում քաղաքականության մեջ: Քաղաքականության մեջ ամեն ինչ պետք է լինի ներդաշնակ:
– Բայց չէ՞ որ հենց այդ նախարարները, որոնց հիշատակեցի, ցանկություն չունեին հանրապետական դառնալու, անգամ Նժդեհի գաղափարախոսությանը ծանոթ չէին, ստիպողաբար հանրապետական դարձրիք: Այդ դեպքում իմաստը ո՞րն էր:
– Ստիպողաբար բառը հանեք, եթե թիմի անդամ են: Բայց ոչ բոլորն են, որ սերտել են Նժդեհի գաղափարները, որևէ մեկը ի ծնե այդպիսին չի եղել: Եվ նաև կա թիմի գաղափարը. կուսակցության՝160.000-ից ավելի բոլոր անդամները չեն կարող լիարժեք տիրապետել Նժդեհի գաղափարախոսությանը: Բնականաբար, հիմնական կորիզը, որոնք հեգեմոն դերում պետք է լինեն, նրանք իրոք պետք է տիրապետեն այն գաղափարախոսությանը, որի վրա հենվում է կուսակցությունը:
– Հիշատակեցիք ԲՀԿ-ի հետ կոալիցիա կազմելը: Նոր խորհրդարանում հնարավոր համարո՞ւմ եք ԲՀԿ-ի հետ կոալիցիոն համագործակցություն: Հնարավո՞ր է՝ սա լինի ազգային համերաշխության իշխանություն, ինչի մասին խոսում էր Սերժ Սարգսյանը ամիսներ առաջ:
– Ուրախ եմ, որ հիշում եք նախագահի խոսքերը: Մենք բազմիցս հայտարարել ենք, որ համագործակցում ենք բոլոր քաղաքական ուժերի հետ: Համագործակցել չի նշանակում պաշտոններ բաժանել և կոալիցիա կազմել: Եվ քաղաքական ուժերը, որոնք ընտրություններից հետո քաղաքական կոնսուլտացիաների արդյունքում առավելագույն ձայներ հավաքած կլինեն, կտեսնենք նրանց ծրագրային դրույթները, գաղափարախոսության մեջ կտեսնենք ընդհանուր ճանապարհ, պատրաստ ենք այդ քաղաքական ուժի հետ ճանապարհ գնալու: Ես չեմ նշում մեկ քաղաքական ուժի հետ, ես ասում եմ՝ այն քաղաքական ուժերի, որոնց հետ մենք կունենանք ճանապարհ:
– Պարոն Բաղդասարյան, իշխանությունն արդեն սկսել է 100 տոկոսանոց ցուցակներ կազմել՝ ներգրավելով այդ աշխատանքի մեջ մանկապարտեզի տնօրեններին նաև: Արման Սահակյանի կնոջ մանկապարտեզում տեսաք, թե ինչպես են ցուցակներ կազմում: Իշխանությունը եթե իսկապես ցանկանում է օրենքի տառին համապատասխան ընտրություն անցկացնել, օրինակ՝ չպե՞տք է ազատեր աշխատանքից իր լիազորությունները չարաշահած տնօրենին:
– Բոլոր քաղաքական ուժերի մեջ նման գործընթացներ կան: Բնականաբար, բոլորը պետք է ինչ-որ ձևով իմանան մարդկանց ուղղվածությունը: Եվ այս ցուցակները ընտրությունների ամենաթույլ կողմն են և երկրորդական: Յուրաքանչյուր անձ պետք է ի վերջո մնա քվեաթերթիկի և իր խղճի հետ: Եվ այդ ամենը լրիվ ձևական բնույթ են կրում: Ի՞նչ է, մանկապարտեզի տնօրենը իրավունք չունի՞ իր քաղաքացիական իրավունքից օգտվելու՝ առավել ևս, եթե այդ կուսակցության անդամ է: Խնդրում եմ մի ծանրացեք այց ցուցակների վրա: Այսօր ռեյտինգային կարգով առաջադրվել եմ: Բոլոր թեկնածուները, քաղաքական ուժերը ցուցակագրումով են զբաղված: Ես դեռ չեմ սկսել, բայց ես էլ նույնն եմ հանձնարարելու, որ տրամադրությունները որսամ, բնակչության հետ շփվեն, ցուցակներ կազմեն: Առայժմ դեռ չեմ հասցրել:
– Եթե համարում եք այդքան թույլ միջոց, ինչո՞ւ է իշխանությունն անընդհատ դիմում այդ միջոցին:
– 90-ականներից մինչև այսօր այդ ցուցակներից 70 տոկոսը պիտանի չէ, նպատակին չի ծառայում, դա փորձված բան է: Հիմա ստեղծվում են շտաբներ, շտաբներում կան աշխատողներ, այդ աշխատողները պետք է ինչ-որ ձևով ընդգրկվեն գործունեության մեջ, և ի վերջո՝ մեզ համար պատկերը պետք է պարզ լինի: Բոլոր քաղաքական ուժերը իրենց նախնական կանխատեսումների համար հարցում պետք է անեն, պետք է հաշվարկ անեն:
– Ձեր ցուցակի հրապարակումից հետո կանանց շրջանում, ասում են, ինտրիգը շարունակվում է…
– Ինչ եք ուզում մեր կանանցից, ինչու եք կպել մեր կանանց ջանին: Մեր կանայք այնքան համերաշխ են, այնքան ջերմ միմյանց հանդեպ: Ինչ խոսակցություն լինում է, իմ առանձնասենյակում է լինում, նման ինտրիգներ չկան: Նախապես ցուցակը բոլորի հետ համաձայնեցրել ենք, իրենք գիտեն իրենց դիրքը, տեղը, որևէ մեկը դուրս չի մնացել, և եթե որևէ մեկի անունը չկա, դա եղել է իր ցանկությամբ:
– Արտաշես Գեղամյանը, Խոսրով Հարությունյանը, Հայկ Բաբուխանյանը շատ ավելի պատկառելի հորիզոնականներ են զբաղեցնում, քան հնաբնակ ՀՀԿ-ականները:
– Կարող է դուք Արտաշես Գեղամյանին, Խոսրով Հարությունյանին և Հայկ Բաբուխանյանին պասիվ քաղաքական գործիչներ եք համարել: Մենք նայում ենք ոչ թե կուսակցական պատկանելությունը, այլ նայում ենք թիմի գաղափարը, և այդ մարդիկ եղել են մեր թիմից: Բավականին ակտիվ պատգամավորներ են եղել, և գտնում ենք՝ շատ ճիշտ է այն ցուցակը, որը կազմված է: